Тожикистонда зилзила оқибатида 100 га яқин уй вайрон бўлди

Тожикистон шимоли-шарқида кеча, 13 апрель куни содир бўлган зилзила оқибатида Рашт ва Тожикобод туманларида 94 та тураржой биноси бутунлай вайрон бўлган. Бу ҳақда мамлакат Фавқулодда вазиятлар қўмитаси хабар бермоқда.

“Яна ўнлаб бинолар қисман ва кичик зарар кўрди. Дастлабки маълумотларга кўра, бир киши ҳалок бўлган”, дейилади қўмита баёнотида.

Маълумки, Уштурпаст қишлоғида уч ёшли бола ҳалок бўлган – у қулаган уй девори остида қолган.

Миллий фанлар академияси Геофизика хизмати маълумотларига кўра, ер силкинишлари соат 09:24 да содир бўлган. Зилзила эпицентри Душанбе шаҳридан 160 км узоқликда, Рашт вилоятида жойлашган.

Зилзила марказида зилзила кучи 5-6 баллни, Душанбеда 3 баллга яқинни ташкил этган.

Рашт вилоятининг Сафедтундак, Гулхани, Кўл, Аскалони ва Хулаки қишлоқларида 40 та уй бутунлай вайрон бўлган, яна 5 таси қисман вайрон бўлган. Шунингдек, учта чойхона, мактаб биноси ва битта ёрдамчи бино зарар кўрган.

Тожикобод туманида 54 та тураржой биноси тўлиқ, 45 таси қисман вайрон бўлган, 61 та бинога эса енгил шикаст етган.

Бундан ташқари, 2 мактаб биноси, 1 тиббиёт пункти, бир нечта чойхона ва 200 га яқин хўжалик иншоотлари шикастланган.

Президент Имомали Раҳмон топшириғига кўра, махсус республика комиссияси тузилди. У аллақачон воқеа жойида ишламоқда: зарарни баҳолаш, жабрланганларга ёрдам бериш ва тиклаш ишларини мувофиқлаштириш.

Эслатиб ўтамиз, Тожикистондаги ушбу зилзила Ўзбекистоннинг 7 вилояти ва Тошкент шаҳрида ҳам сезилганди.