Тожикистон чегарачилари билан отишмада икки афғонистонлик ҳалок бўлди

Тожикистон Миллий хавфсизлик давлат қўмитаси тезкор ходимлари чегарачилар билан биргаликда афғон наркодилерларини қўлга олиш бўйича операция ўтказди, унда отишма содир бўлиб, у икки қоидабузарнинг ўлими билан якунланди. Бу ҳақда “Khovar” хабар берди.

Нашр маълумотларига кўра, тезкор ходимлар Бадахшон вилоятида туғилган 50 ёшли Азархон Саидумар бошчилигидаги гиёҳванд моддалар контрабандачилари гуруҳининг ҳаракатланиш маршрутини аниқлаган. Жиноятчилар Шамсиддин Шохин ҳудудидаги юк билан Тожикистон чегарасини ноқонуний кесиб ўтган.

Хавфсизлик кучлари гуруҳни қўлга олишга қарор қилган. Операция давомида контрабандачилар ўз ихтиёри билан таслим бўлиш буйруғига бўйсунмай, ўт очган. Жавоб ўқлари оқибатида контрабанда гуруҳи раҳбари Саидумар ва унинг шериги Азизи Рўзмуҳаммад зарарсизлантирилган. Тўданинг қолган аъзолари Афғонистонга қочиб кетган.

Воқеа жойидан 2 дона Калашников автомати ва 17 дона ўқ-дорилар, тунги кўриш мосламаси, резина қайиқ, 3 та сумкада 59 дона афюн брикети ва битта брикет метамфетамин топиб олинган. Тақиқланган моддаларнинг умумий оғирлиги 58,5 килограммни ташкил этади.

Мазкур ҳолат юзасидан Миллий хавфсизлик давлат қўмитасининг Хатлон вилояти бўйича тезкор гуруҳининг Тергов бошқармаси томонидан жиноят иши қўзғатилиб, жиноий гуруҳнинг шерикларини аниқлаш ва ушлаш бўйича тезкор-қидирув тадбирлари олиб борилмоқда.

Эслатиб ўтамиз, аввалроқ Қирғизистоннинг Ўш вилоятида махсус хизматлар Ўзбекистонга Қирғизистон орқали чегаранинг ҳимоясиз участкалари орқали сотиладиган мобил телефонлар ва тақиқланган препаратларни олиб кириш билан шуғулланган контрабандачилар фаолиятини тўхтатганди.