Тошкентдаги Меҳрибонлик уйида тарбияланувчилар ўтказган митинг уюштирилгани айтилди

Тошкентнинг Юнусобод туманидаги 21-сонли Меҳрибонлик уйи болаларининг норозилик уюштириши билан боғлиқ ҳолат уюштирилгани маълум бўлди. Бу ҳақда ЎзА хабар берди.

Қайд этилишича, муассаса собиқ раҳбарияти ва айрим ходимлар ўртасидаги келишмовчилик болалардан фойдаланишгача борган. Ушбу ҳолатни Бола ҳуқуқлари бўйича вакил Алия Юнусова Меҳрибонлик уйи раҳбарияти томонидан мавжуд ички муаммолардан бошқаларни чалғитиш мақсадида уюштирилган “сценарий” сифатида баҳолаган.

“Сир эмас, бу муассасада болаларнинг ҳуқуқ ва эркинликлари, манфаатларининг бузилиши, болаларга нисбатан зўравонлик ҳолатлари учради. Шундан эътиборни чалғитиш мақсадида ташкил этилган “режали тадбир”да болалардан фойдаланилгани жуда ачинарли”, деган Алия Юнусова.

Эслатиб ўтамиз, жорий йилнинг 21 апрель куни 21-сонли Меҳрибонлик уйи тарбияланувчилари муассаса ҳовлисига чиқиб, норозилик намойиши уюштиргани ҳақида хабар ва видео тарқалганди.

Қисқа вақтдан кейин 21-сонли Меҳрибонлик уйи директори лавозимида ишлаб келган Умида Илҳомовна Маманова бошқа ишга ўтганлиги муносабати билан ўз вазифасидан озод этилди. Унинг ўрнига Яхшигул Насимовна Шодиева Меҳрибонлик уйига директор этиб тайинланди. Яхшигул Шодиева бунгача пойтахтнинг Олмазор тумани халқ таълими бўлими мудири вазифасида фаолият кўрсатиб келаётган эди.