Тошкентдаги қонли ЙТҲ қурбонлари 2 нафар экани маълум бўлди (видео)

Аввалроқ, Тошкент шаҳрида содир бўлган йўл-транспорт ҳодисасида Lacetti автомобили иккига бўлиниб кетгани ҳақида хабар берилган эди. Орадан 1 ҳафта ўтиб ушбу ЙТҲ оқибатида 2 киши ҳалок бўлгани ва 3 киши жароҳатлангани маълум бўлди. Бу ҳақда Тошкент шаҳар Ички ишлар бош бошқармаси хабар берди.

Маълумотларга кўра, Kia автомобилини вояга етмаган шахс бошқарган. Ҳодисадан сўнг у қилган ишини тан олиб, машинани отасидан яширинча олиб чиққанини айтган.

“Дадамнинг машинасини кечаси сўрамасдан олиб чиқиб кетдим. Ўртоқларимни чақиргандим. Мақсад озгина машина ҳайдаш эди. Чорраҳада Lacetti йўлга чиқиб қолди, тезлигим юқори бўлгани учун машинани тўхтата олмадим. Қилган ишимдан жуда афсусдаман. Вафот этганларнинг яқинларидан, ота-онамдан ва бутун халқимиздан узр сўрайман. Мен тенгдошларимга ҳеч қачон рулга ўтирмасликни тавсия қиламан”, дейди у.

Вояга етмаган шахснинг отаси ҳам ўғлининг хатти-ҳаракати оқибатида бир оилага оғир мусибат етганини айтиб, марҳумларнинг яқинларидан кечирим сўради.

“Ўғлим машинанинг калитини яширинча олиб чиқиб кетиб, бировнинг оиласини барбод қилди. Қонун қандай жазо белгиласа, шунга тайёрмиз. Ҳаммадан узр сўрайман”, деди у.

Ҳодиса вақтида автомобилда бўлган яна бир вояга етмаган йигит ҳам воқеадан кейин шок ҳолатида уйига кетиб қолганини билдириб, содир бўлган фожиадан чуқур афсусда эканини айтди.

Мазкур ҳолат юзасидан Тошкент шаҳар ИИББ ҳузуридаги Тергов бошқармаси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми “а” банди билан жиноят иши қўзғатилган. Ҳозирда воқеа юзасидан дастлабки тергов ҳаракатлари давом этмоқда.

Эслатиб ўтамиз, аввалроқ мазкур йўл-транспорт ҳодисаси оқибатида бир аёл вафот этгани, унинг фарзанди эса етим қолгани ҳақида хабар берилган эди.