“Farhod” avtoqismlar bozorida 12 kishilik jinoiy guruh qo‘lga olindi (video)

Toshkent shahridagi kriminogen vaziyatni sog‘lomlashtirish hamda jinoyatchilikka barham berish yo‘nalishida olib borilgan tezkor-qidiruv tadbirlari doirasida jinoiy guruh faoliyatiga chek qo‘yildi. Bu haqda Davlat xavfsizlik xizmati xabar berdi.

Qayd etilishicha, Uchtepa tumanining Farhod ko‘chasida joylashgan “Avtomobil ehtiyot qismlari” bozorida 12 nafar shaxsdan tashkil topgan jinoiy guruh faoliyatiga barham berilgan. Jumladan, jinoiy guruh a’zolari mijozning avtotransport vositasiga uning ruxsatisiz va oldindan kelishmagan holda turli jihozlar o‘rnatib, texnik xizmat ko‘rsatgan. Shundan so‘ng, ushbu xizmat bozor narxida 600 dollar bo‘lishiga qaramasdan, fuqarodan 13 ming 300 dollarni tovlamachilik yo‘li bilan undirgan. O‘z haqqini talab qilgan mijozga ular qo‘rqitish yo‘li bilan tahdid qilgan.

Yana shunga o‘xshash holatda esa jinoiy guruh a’zolari boshqa bir fuqaroning avtomashinasiga uning roziligisiz turli ehtiyot qismlarni o‘rnatib, undan 3 barobar qimmat narxda pul talab qilgan. Aniqlanishicha, ular avtomashina kalitini fuqarodan olib qo‘yib, tazyiq o‘tkazish orqali undan 15 million so‘m undirgan.

DXXning yozishicha, qonunbuzarlar yana 2 fuqaroning avtomashinasini qo‘shimcha ehtiyot qismlar bilan jihozlash uchun ulardan jami 70 million so‘m miqdorida pul olib, va’da qilingan ishni bajarmagan.

Ma’lumot uchun, jinoiy guruh a’zolarining ko‘pchiligi 1988-2002 yillar oralig‘ida Toshkent shahri, Qashqadaryo va Surxondaryo viloyatlarida tug‘ilgan bo‘lib, ularning aksariyati muqaddam sudlangan shaxslar hisoblanadi.

Hozirda mazkur shaxslarning barchasiga nisbatan Jinoyat kodeksining 165-moddasi (tovlamachilik) va 168-moddasi (firibgarlik) bilan jinoyat ishi qo‘zg‘atilib, qamoq ehtiyot chorasi qo‘llangan. Tergov doirasida guruh a’zolarining boshqa jinoiy harakatlariga va ulardan jabr ko‘rgan fuqarolarning shaxsiga aniqlik kiritish bo‘yicha zarur chora-tadbirlar amalga oshirilmoqda.

Eslatib o‘tamiz, avvalroq Qoraqalpog‘iston Respublikasi Beruniy tumani hokimining o‘rinbosari pora bilan qo‘lga tushgandi.