Тошкентда йўловчи автобусдан йиқилиб жароҳатланди

10 декабрь куни ижтимоий тармоқларда автобус йўловчилар чиқиб улгурмасдан аввал ҳаракатлангани оқибатида бир аёл жароҳатлангани ҳақида хабарлар тарқади. Ушбу вазият юзасидан “Тошшаҳартрансхизмат” АЖ муносабат билдирди.

Билдирилишича, воқеа соат 15:30 ларда, Мирзо Улуғбек тумани, Қорасув мавзеси, Мингбулоқ кўчаси, “Универсам бекати”да содир бўлган. Гап шундаки, "5-Автобус саройи” филиали тасарруфидаги “Юнусобод мавзеси 9 даҳаси – Чингелди маҳалласи” йўналишида ҳаракатланаётган 50-сонли автобус (ҳайдовчи Ш.Б.) йўловчиларни тўлиқ тушириб-чиқариб бўлмасдан ҳаракатланган. Оқибатда автобусга ҳали чиқиб улгурмаган йўловчи (Т.М.) йиқилиб тушган ва тан жароҳати олган.

“Йўл-транспорт ҳодисаси содир бўлган жойга дарҳол тез-тиббий ёрдам ходимлари чақирилиб, РШТТЁ марказига олиб борилган ва биринчи тез-тиббий ёрдам кўрсатилиб ташхис қўйилган. Ташхис натижаларига кўра, йўловчи юз қисми пешонасидан енгил тан жарохати олганлиги ҳамда ўнг қўли синганлиги аниқланган”, дейилади хабарда.

Ҳозирда ушбу йўл-транспорт ҳодисаси Тошкент шаҳар ИИББ ЙҲХБ ходимлари томонидан расмийлаштирилиб дастлабки тергов ва суриштирув ишлари олиб бориляпти.

Эслатиб ўтамиз, 29 ноябрь куни Тошкент шаҳрида Mercedes-Benz русумли автобус ва MAN юк автомобили иштирокида йўл-транспорт ҳодисаси содир бўлганди. Оқибатда автобуснинг 3 нафар йўловчиси жароҳатланган.