Toshkentda yo‘l haqini to‘lamaganlarni jarimaga tortish boshlandi

Joriy yilning 14 mart kunidan boshlab Toshkent shahrida yo‘l haqini to‘lamasdan harakatlanganlar 37 500 so‘m miqdoridagi jarimaga tortiladi. Bu haqda “Toshshahartransxizmat” aksiyadorlik jamiyati xabar berdi.

Ma’lum qilinishicha, bunga qadar to‘lov amalga oshirmagan yo‘lovchilarga tushuntirish-targ‘ibot ishlari olib borilgan.

“Bugungi kunga qadar, avtobus yo‘nalishlarida yo‘l haqi to‘lovini amalga oshirmagan yoki chiptasiz harakatlangan yo‘lovchilarga tushuntirish-targ‘ibot ishlari olib borildi. Shunga qaramay yo‘lovchilar orasida yo‘l haqini qasddan to‘lamaslik holatlari ko‘paymoqda”, deyiladi xabarda.

Unda qo‘shimcha qilinishicha, joriy yilning 14 mart kunidan boshlab avtobus yo‘nalishlarida yo‘l haqi to‘lovini amalga oshirmagan yoki chiptasiz harakatlangan yo‘lovchilarga O‘zbekiston Respublikasining Ma’muriy javobgarlik to‘g‘risidagi kodeksi 144-moddasiga (transportda chiptasiz yurish) asosan, 37 500 so‘m miqdorida jarima qo‘llanila boshlanadi.

Ma’lumot uchun, O‘zbekiston Respublikasining Ma’muriy javobgarlik to‘g‘risidagi kodeksining 144-moddasiga ko‘ra, trolleybusda, tramvayda, shahar ichida va shahar atrofiga qatnaydigan avtobusda, marshrut taksisida kira haqi to‘lamasdan yuk olib yurish, har bir yuk joyi uchun bazaviy hisoblash miqdorining o‘ndan bir qismi (37 500 so‘m) miqdorida jarima solishga sabab bo‘ladi.

Eslatib o‘tamiz, joriy yil 1 yanvar kunidan boshlab avtobuslarda naqd pul qabul qilish amaliyoti to‘xtatilgan edi. Ayni shu sanadan boshlab poytaxt jamoat transporti yo‘nalishlarida (avtobus va metropoliten) bir yo‘lovchi qatnovi uchun cheklangan tarif – 3 000 (uch ming) so‘m etib belgilandi. Bunda to‘lov elektron to‘lov tizimi (transport yoki bank kartasi) orqali amalga oshirilganda hozirgidek o‘zgarishsiz qoladi – 1 700 so‘m. Barcha avtobuslar salonida yo‘lkira haqini naqd pulda olish amaliyotidan voz kechiladi. Keyinchalik, Transport nazorati inspeksiyasi boshlig‘i o‘rinbosari Sanjar Turg‘unov O‘zbekiston axborot va ommaviy kommunikatsiyalar agentligida bo‘lib o‘tgan matbuot anjumanida avtobuslarga ortiqcha yuk bilan chiqilganda qo‘shimcha to‘lov tizimi yo‘lga qo‘yilishi kutilayotgani haqida gapirgandi.