Тошкентда Tracker ЙПХ инспекторини уриб кетди (видео)

Тошкент шаҳрида тирбандликни камайтириш учун чорраҳа марказида хизмат қилаётган йўл-патруль хизмати ходимини Tracker уриб кетди. Бу ҳақда пойтахт Ички ишлар бош бошқармаси хабар берди.

Қайд этилишича, жорий йилнинг 23 апрель куни эрта тонгда Дўрмон йўли Мирзо Улуғбек кўчалари кесишмасидаги чорраҳада хизмат олиб бораётган Тошкент шаҳар ИИББ ЙҲХБ йўл-патруль хизмати инспектори сержант Тоштемиров Арманни Tracker русумли транспорт воситаси уриб юборган. Шифохонага олиб борилган инспекторга ўнг ва чап қўл кўплаб шилинмалари, чап чаноқ суягининг бир неча жойдан синиши, чап тизза соҳаси ва оёқ юмшоқ тўқималари лат ейиши ташхис қўйилган.

“Чорраҳа озгина тирбанд бўлгани сабабли енгиллаштириш мақсадида мақсадида чорраҳага чиқдим. Ўзимга қулай жойни танлаб, чорраҳа марказида… Билмайман, тўртинчи қаторидан келдими, учинчидан келдими, Tracker русумли автомобиль урилди”, дейди ходим. 

Билдирилишича, мазкур ҳолат юзасидан терговга қадар текширув ҳаракатлари олиб борилмоқда. Якунда қонуний қарор қабул қилинади.

Эслатиб ўтамиз, аввалроқ Тошкент шаҳар Яккасарой туманида ЙПХ инспекторини автомашинаси капотида судраган ҳайдовчи 15 суткага қамалганди.