Тошкентда пора олган ҳокимлик ходими ушланди

Тошкент вилоятида 1500 АҚШ доллари миқдорида пора олган ҳокимлик ходими ушланди. Бу ҳақда Давлат хавфсизлик хизмати хабар берди.

Қайд этилишича, Давлат хавфсизлик хизматининг Тошкент вилояти бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида тезкор тадбир ўтказилган. Оҳангарон туман ҳокимлиги бош юрисконсульти “Эйвалек” маҳалла фуқаролар йиғини ҳудудида жойлашган ва ҳокимлик балансида бўлган хонадонни юқори лавозимда ишловчи танишлари орқали фуқаро номига расмийлаштириб бериш эвазига 1500 АҚШ доллари олган вақтида ашёвий далиллар билан ушланган.

“Бош юрисконсульт муқаддам бир неча маротаба судланган бўлишига қарамасдан, ўзига тегишли хулоса чиқармаган”, дейилади хабарда.

Ҳозирда унга нисбатан Жиноят кодексининг 168-моддаси (фирибгарлик) 3-қисми “в” банди ва 28,211-моддаси (пора олиш) 1-қисми билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Тошкент шаҳрида ва Сурхондарё вилоятида мижозлардан 3700 АҚШ доллари ва 60 миллион сўм олган адвокатлар ушланган эди.