Тошкентда метро поезди тўхтаб қолди (видео)

Бугун, 28 март куни ижтимоий тармоқларда “Пахтакор” метро бекатида поездлар тўқнашиб кетгани ва оқибатда йўловчилар 30 дақиқага яқин қолиб кетгани ҳақида хабарлар тарқалди. Ҳолат юзасидан “Тошкент метрополитени” расмий баёнот берди.

Қайд этилишича, соат 11:49 да “Халқлар дўстлиги” метро бекатига кириб келган 1984 йилда ишлаб чиқарилган 15-сонли ҳаракат таркибида қисқа муддатли техник носозлик аниқланган.

Мазкур ҳолат юзага келиши билан ҳаракат таркиби машинисти зудлик билан поезд нозимига тегишли тартибда ахборот берган.

Вазият тезкор равишда назоратга олиниб, йўловчилар хавфсизлигини таъминлаш мақсадида улар бекатда туширилган ҳамда ҳаракат таркиби техник кўрик йўлагига олиб чиқилган.

“Юзага келган вақтинчалик ноқулайликлар учун йўловчилардан узр сўраймиз”, дейилади баёнотда.

Ҳолат юзасидан “Тошкент метрополитени” Qalampir.uz’ga поездлар тўқнашиб кетмаганини маълум қилди.

Эслатиб ўтамиз, аввалроқ “Пушкин” метро бекатидан “Ҳамид Олимжон” метро бекати томон ҳаракатланаётган 10-сонли ҳаракат таркиби туннель ичида тўхтаб қолганди.