Тошкентда котлован нотўғри қазилиши оқибатида симёғоч қулаб тушди (видео)

Тошкент шаҳрининг Шайхонтоҳур тумани Кохота кўчасидаги қурилиш жараёнида котлован нотўғри қазилгани сабабли симёғоч қулаб тушгани ва бу қўшниларнинг уйида ёнғин чиқишига сабаб бўлгани, ёнғин аҳоли томонидан ўчирилгани тўғрисида таҳририятга маълумот келиб тушди. QALAMPIR.UZ ҳолатга аниқлик киритиш мақсадида пойтахт Қурилиш ва уй-жой коммунал хўжалиги соҳасида назорат қилиш инспекцияси билан боғланди.

Маълум бўлишича, кеча, 15 май куни қурилиш объектининг яқинида, йўл четида ўрнатилган симёғоч (устун) қисман эгилган ва қулаган. Дастлабки маълумотларга кўра, ушбу ҳолат қурилиш жараёнидаги эҳтиётсизлик ортидан содир бўлган.

Ҳодисадан сўнг Қурилиш ва уй-жой коммунал хўжалиги соҳасида назорат қилиш инспекциясининг масъул ходимлари воқеа жойига чиққан ва ҳолат атрофлича ўрганилган. Текширув давомида ҳеч ким жабрланмагани, аҳоли ва атрофдаги объектларга жиддий зарар етмагани аниқланган. Шу билан бирга, етказилган техник зарар қурилиш ташкилоти томонидан тез фурсатда бартараф этилган.

“Ҳолат юзасидан ташкилот масъуллари билан тушунтириш ишлари олиб борилди ва ёзма кўрсатмалар берилди. Бундай ҳолатлар такрорланмаслиги учун қурилиш майдонларида хавфсизлик талабларига қатъий риоя қилиш муҳимлиги яна бир бор эслатилди”, дейилади расмий муносабатда.

Эслатиб ўтамиз, аввалроқ Чилонзор туманида ҳам котлован қазилаётганда йўлнинг бир қисми ўпирилиб тушган эди.