Тошкентда 3 та автомобиль иштирокида ЙТҲ юз берди (видео)

Тошкент шаҳар Шайхонтоҳур туманида 3 та автомобиль иштирокида йўл-транспорт ҳодисаси содир бўлди. Бу ҳақда Ички ишлар бошқармаси Йўл ҳаракати хавфсизлиги бошқармаси хабар берди.

Қайд этилишича, бугун, 17 январь куни соат 01:30 ларда Шайхонтоҳур тумани Себзор кўчасидаги кўприк устида Lacetti, HOWO юк транспорт воситаси ва Lacetti автомашиналари иштирокида йўл-транспорт ҳодисаси содир бўлган ва оқибатда Lacetti ағдарилиб кетган. Ҳодисага сабаб бўлган ҳайдовчининг 17 ёш экани ва тезликни меъёридан ошириб юборгани, шунингдек, ҳужжатлари мавжуд эмаслиги аниқланган.

Билдирилишича, ЙТҲ оқибатида тан жароҳат олганлар йўқ. Ҳолат юзасидан Тошкент шаҳар ИИББ ЙҲХБ томонидан суриштирув ишлари олиб борилмоқда.

Эслатиб ўтамиз, аввалроқ Тошкент шаҳар Мирзо Улуғбек туманида пиёдага йўл бериш учун тўхтаган Nissan бошқа автомобиль айби билан уларни уриб юборган эди. ЙТҲ оқибатида пиёдаларга биринчи тез тиббий ёрдам кўрсатилган.