17 ёшли курьерни ҳақоратлаган Brasserie ресторани ходими жазоланди (видео)

Тошкентда Brasserie ресторанидан буюртма олиб кетаётган 17 ёшли курьер билан жанжаллашиб, унга қўпол муомала қилган эркакка нисбатан маъмурий баённома расмийлаштирилди. Бу ҳақда Тошкент шаҳар Ички ишлар бош бошқармаси хабар берди.

Аввалроқ, ижтимоий тармоқларда эркакнинг курьер билан жанжаллашгани акс этган видеолар тарқалган эди. Видеода 17 ёшли курьер воқеа ресторанидан буюртма етказиб бериш вақтида содир бўлганини айтган. Унинг сўзларига кўра, эркак унга нисбатан ҳақоратли сўзлар ишлатган.

Ўз навбатида, ресторанда ишлашини айтган эркак ҳам воқеа юзасидан изоҳ бериб, курьернинг скутерда ресторан олдидаги йўлакдан ҳаракатлангани сабабли унга тўхташни айтганини билдирган.

Маълум қилинишича, воқеа жорий йилнинг 17 октябрь куни соат 13:00 ларда Миробод туманидаги Brasserie ресторани олдида содир бўлган. 1990 йилда туғилган С.Р. ва вояга етмаган 2009 йилда туғилган М.Я. ўртасида келишмовчилик юзага келган.

Шундан сўнг эркак вояга етмаган шахсга нисбатан қўпол муомалада бўлиб, жамоат тартибини бузган.

Билдирилишича, ҳолат юзасидан С.Р.га нисбатан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий баённома расмийлаштирилган. Ушбу моддага кўра, ҳуқуқбузарлик учун базавий ҳисоблаш миқдорининг уч бараваридан беш бараваригача жарима солиш ёки 15 суткагача маъмурий қамоқ жазоси қўлланилиши мумкин. Тўпланган ҳужжатлар жиноят ишлари бўйича туман судига юборилган.

Эслатиб ўтамиз, аввалроқ Тошкент шаҳрининг Чилонзор туманида кўп қаватли уй йўлагига ўрнатилган юзни таниб олувчи кузатув камерасини тепиб синдирган уч нафар йигит аниқлангани ҳақида хабар берилган эди.