Toshkent viloyatida yirik avariya yuz berdi

Bugun, 1 aprel kuni Toshkent viloyatida Howo, Zil, Cobalt va Nexia rusumli avtomobillar o‘rtasida yo‘l-transport hodisasi yuz berdi. Bu haqda viloyat YHXB axborot xizmati xabar berdi

Ma’lum qilinishicha, soat tahminan 08:00 larda Toshkent viloyati Ohangaron tumani hududidan o‘tgan A373 Toshkent-O‘sh avtomobil yo‘lining 34-kilometrida 4 ta transport vositasi – Howo va Zil rusumli yuk avtomobillari hamda Cobalt va Nexia rusumli yengil avtomobillar ishtirokida yo‘l-transport hodisasi sodir bo‘lgan.

Ushbu yo‘l-transport hodisasi natijasida harakat ishtirokchilari sog‘lig‘iga ziyon yetmagan. Transport vositalari texnik shikastlangan.

Qo‘shimcha qilinishicha, hozirda holat yuzasidan Ohangaron tumani IIB YHXB tomonidan surishtiruv ishlari olib borilmoqda.

Eslatib o‘tamiz, avvalroq Toshkent viloyatining O‘rta Chirchiq tumanida Nexia-2 rusumli avtomobil boshqa bir avtomashina bilan to‘qnashgandi va oqibatda yonib ketgandi. YTH va yong‘in natijasida harakat ishtirokchilarini sog‘lig‘iga ziyon yetmagan.