Тошкент энг коррупциялашган шаҳарга айланди

Жамият 9621
image

2021 йилда Тошкент шаҳрида 184 та коррупцион жиноят содир этилган. Бу 2020 йилга нисбатан 125 тага кўп демакдир. Бу ҳақда Коррупцияга қарши курашиш агентлиги директори Акмал Бурхонов кеча, 14 июнь куни Тошкент шаҳар ҳокимлигида бўлиб ўтган йиғилишда сўз очди. 

Қайд этилишича, 2021 йилда Тошкент шаҳрида содир этилган коррупцияга оид жиноятлар оқибатида давлат ва жамият манфаатларига 82 млрд 638 млн сўмлик моддий зарар етказилган.  

Шунингдек, пойтахт коррупцияга оид жиноятлар содир қилиш кўрсаткичи бўйича ўтган 3 ойда (февраль-апрель) республикада энг юқори ўринларда тургани айтилди. Хусусан, февраль ойида 37 та, март ойида 50 та, апрель ойида эса 69 та коррпцияга оид жиноят ишлари судларга юборилган.

“Мулоқотлар жараёнида бюджет маблағларидан ноқонуний фойдаланиш ҳолатлари, коррупция тарқалганлиги бўйича жамоатчилик фикри, очиқликка оид қонунчилик ҳужжатлари ижросини таъминлаш йўналишларидаги натижалар ҳам танқидий муҳокама этилди.   

Иштирокчилар томонидан бу каби салбий ҳолатлар Тошкент шаҳрида коррупцияга қарши курашиш ва олдини олиш тизимини янада такомиллаштириш, бунда ҳар бир бошқарма ва идоралар ўз ишини танқидий кўриб чиқиши мақсадга мувофиқ эканлигига алоҳида урғу берилди. 

Хусусан, Ҳудудий кенгаш ўз фаолиятида мониторинг ва назорат тадбирларини  ўтказиш, эшитувлар ташкил этиш каби инструментлардан самарали фойдаланиши лозимлиги алоҳида таъкидланди”, дейилади Коррупцияга қарши курашиш агентлиги тарқатган хабарда. 

Эслатиб ўтамиз, аввалроқ, Коррупцияга қарши курашиш агентлиги Андижон вилояти 2022 йилнинг биринчи чорагида мамлакатда энг коррупциялашган вилоят бўлганини маълум қилганди. 

Qalampir.uz Tahririyati
Мақолага баҳо беринг
Баҳолаганлар: 160
Рейтинг: 3.1
t
×