Тошкент ҳокимлигидан кутилмаган ғамхўрлик

Пойтахт Тошкентда нарх-наво кун сайин ошиб бормоқда. Супермаркетлар қаторида бозорларда ҳам нарх наво кўтарилганини гувоҳ бўляпмиз. Тошкент шаҳар ҳокимлиги  Деҳқон бозорларида қишлоқ хўжалик маҳсулотлари нархлари асоссиз ошиб кетишининг олдини олиш мақсадида Тошкент шаҳар ҳокимининг қарорига асосан “Элга хизмат” масъулияти чекланган жамиятлари ташкил этилгани маълум қилди. Мазкур корхона учун деҳқон бозорларининг аҳоли гавжум ва харидорлар учун қулай бўлган жойларидан 40 та савдо нуқтаси ажратилган. Қайд этилишича, арзонлаштирилган маҳсулотлар аҳолига нақд пулга ҳамда пластик карточкалар орқали сотилмоқда. 

Тошкент шаҳар ҳокимлиги томонидан деҳқон бозорларида гўшт нархининг барқарорлигини таъминлаш мақсадида жами 30 та савдо жойлари бепул ажратиб берилган. Улар томонидан арзонлаштирилган нархларда:

•    қўй ва мол гўшти – 1 кг учун 32000-36000 сўмдан сотилиши;
•    тухумнинг донаси 350 сўмдан 550 сўмгача;
•    музлатилган ва янги сўйилган товуқ гўшти 1 кг учун 14.000-18.000 сўмгача нархларда аҳолига сотилиши ташкил этилган.

Тошкент шаҳар ҳокимлигининг ташаббуси билан деҳқон бозорларининг марказий ҳудудларидан озиқ-овқат маҳсулотлари савдоси учун жойлар ажратилган ва уларда товарлар арзонлаштирилган нархларда сотилиши йўлга қўйилган. Масалан: 

•    шакар 4600 сўмдан 4850 сўмгача,
•    ун 2700 сўм,
•    гуруч 5700 сўм,
•    ўсимлик ёғи 8800-9000 сўм.

Бу савдо нуқталарида ҳам тўлов нақд пул ҳамда тўлов терминаллари орқали амалга оширилаётгани айтилмоқда. 

Шу кунга қадар Тошкент шаҳар деҳқон бозорларига Сурхондарё вилоятидан 1500 тоннадан ортиқ картошка, пиёз ва карам маҳсулотлари келтирилиб, алоҳида ташкил этилган савдо расталари ва юк машиналари орқали арзонлаштирилган нархларда сотилмоқда. 

Айни пайтда барча деҳқон бозорлари худудларида 40 дан ортиқ юк машиналари ҳамда алоҳида ташкил этилган савдо расталари орқали арзонлаштирилган нархларда 375 тоннадан ортиқ қишлоқ хўжалик маҳсулотлари, сабзавотлар ва хўл мевалар савдоси ташкил этилди ва давом этмоқда.