Томи учган уйлар... Президент Бухоро талафотларини вертолётдан кузатди

Ўзбекистон Республикаси Президенти Шавкат Мирзиёев Бухоро вилоятига етиб келди. 

27 апрель куни республикага Туркманистон ҳудудидан кучли шамол кириб келган, Бухоро, Навоий, Самарқанд ва Қашқадарё вилоятларида секундига 9-40 метргача тезликда шамол эсган эди. Оқибатда бир неча фуқаро жароҳатланиб, бир киши ҳалок бўлди. Шунингдек, уй-жойлар, автотранспорт воситалари, инфратузилма объектлари ва экин майдонларига зарар етди.

Президент Шавкат Мирзиёев бугун зудлик билан Бухоро вилоятига етиб борди. Вертолётда Қоракўл ва Олот туманларидаги ҳолатни кўздан кечирди. 

Олот тумани марказида маҳаллий аҳоли вакиллари, фаоллар билан учрашув ўтказилди. 

Давлат раҳбари кечаги кучли шамол кутилмаган ва илгари кузатилмаган табиий офат бўлганини, одамлар турмуши, қишлоқ хўжалиги ва бошқа соҳаларга салбий таъсир қилганини афсус билан қайд этди. 

“Халқимиз ҳамжиҳат бўлиб, бундай синовларни кўп енгиб ўтган. Бу сафар ҳам зарур чора-тадбирлар кўрилиб, талофат оқибатлари тезда бартараф этилади. Энг муҳими, руҳни туширмай, биргаликда курашсак, бу қийинчиликлардан кучли бўлиб чиқамиз”, деб таъкидлади Президент.

Турар жойлар ва инфратузилма объектларини таъмирлаш, аҳолига ҳар томонлама кўмаклашиш бўйича мутасаддиларга топшириқлар берилди. Қишлоқ хўжалиги, иқтисодиёт тармоқлари, жамоат хавфсизлиги юзасидан тезкор чора-тадбирлар белгиланди.

Эслатиб ўтамиз, кеча қўшни давлатдан кириб келган циклон сабаб Ўзбекистон марказий вилоятларида табиий офат кузатилди. Бухорода бир киши ноқулай об-ҳаво қурбони бўлди.