“Толибон” 40 ёшгача бўлган аёлларга Термиздаги бозорга боришни тақиқлади

north_east

“Нафас олишдан бошқа ҳаммаси”. Афғон аёлларига бугун нималар тақиқланган?

Афғонистондаги “Толибон” муваққат ҳукумати 40 ёшгача бўлган аёлларни Афғонистон-Ўзбекистон чегарасидаги бозорга киритмаяпти. Бу ҳақда Amu TV хабар берди.

Маҳаллий аҳоли ва дўкон эгаларининг хабар беришича, яқинда Афғонистондаги “Толибон” муваққат ҳукуматининг “аҳлоқ полицияси” деб аталувчи тузилмаси Термиздаги Афғонистон-Ўзбекистон чегарасида жойлашган умумий бозорга 40 ёшдан кичик аёлларнинг киришини тақиқлаган. Уларнинг айтишича, бу чеклов харидорлар оқимини кескин камайтирган ва чегарадош ҳудудлардаги иқтисодий фаолликка салбий таъсир кўрсатмоқда.

“Авваллари мижозларимизнинг асосий қисмини оилалар, жумладан, аёллар ташкил этарди. Энди эса ёш аёллар киритилмаётгани сабабли савдомиз кескин тушиб кетди”, дейди афғон савдогаридан бири.

Нашрга кўра, ушбу чеклов “Толибон” томонидан жамоат ва иқтисодий ҳаётда аёллар иштирокини чеклашга қаратилган янада қатъийроқ ижтимоий сиёсатнинг бир қисми сифатида қаралмоқда. Улар бу чекловга расмий изоҳ бермаган. Бу бозор эса ҳозиргача афғон оилалари бирга савдо ва харид қилиши мумкин бўлган кам сонли жойлардан бири бўлган.

“Илгари савдо ёки харид мақсадида Термизга йўл олган оилалар эндиликда бундай сафарларни камайтиришга мажбур бўлганини билдиришмоқда. Бозор эгалари агар “Толибон” бу сиёсатдан воз кечмаса, иқтисодий оқибатлар чегарадаги одамларнинг ҳаётига янада салбий таъсир кўрсатишидан огоҳлантиришмоқда”, дейилади хабарда.

Эслатиб ўтамиз, аввалроқ “Etilaatroz” газетаси “Толибон” муваққат ҳукумати аёлларга жамоат намозларини адо этиш учун масжидларга боришни тақиқлаганини хабар қилганди. Янги чекловлар ҳақида аҳоли имомлар орқали оғзаки тарзда хабардор қилинган.