“Титаник” йўловчисининг хати аукционда 400 минг долларга сотилди

“Титаник” йўловчисининг хати аукционда рекорд нарх – 400 минг долларга сотилди. Бу ҳақда “The Guardian” хабар берди.

Нашрнинг ёзишича, савдодан олинган сумма дастлаб кутилган 60 минг фунт стерлингдан беш баравар кўпроқ бўлиб, афсонавий кемада ёзилган хатлар учун рекорд натижага айланган.

Хат муаллифи – биринчи классда саёҳат қилган полковник Арчибалд Грейс. Хат 1912 йил 10 апрель санаси билан ёзилган – у “Титаник” кемасига Саутгемптонда чиққан кунда. Конверт устида 11 апрель куни Куинстаун ва 12 апрель куни Лондонда қўйилган почта муҳрлари мавжуд.

“Бу ажойиб кема, бироқ саёҳат тугамагунча якуний фикр билдиришдан тийиламан”, деб ёзган Арчибалд Грейс.

Полковник Грейс “Титаник” фожиасидан омон қолган кам сонли биринчи класс йўловчиларидан бири бўлган.

Маълумот учун, “Титаник” – XX аср бошидаги энг йирик йўловчи трансатлантик кема. У 1912 йил 10 апрель куни Саутгемптон (Буюк Британия) — Нью-Йорк (АҚШ) йўналиши бўйича, Шербур (Франция) ва Куинстаун (Ирландия) орқали ўтадиган ўзининг илк ва сўнгги сафарига отланган. 1912 йил 15 апрелга ўтар кечаси кема айсберг билан тўқнашиб, Шимолий Атлантикада чўккан. Бортда 2200 дан ортиқ одам бўлган, улардан фақат 712 нафари омон қолган.

Эслатиб ўтамиз, аввалроқ “Титаник”даги 700 нафар йўловчини қутқариб қолган капитанга совға қилинган олтин чўнтак соати аукционда деярли 2 миллион доллар (ўзбек сўмида 25 миллиард 501 миллион 500 минг сўм) га сотилганди.