TikTok асосчиси Хитойнинг энг бой одами бўлди

ByteDance компанияси асосчиси Чжан Имин эндиликда Хитойнинг энг бой одамига айланди. Бу ҳақда “Bloomberg” хабар берди.

“Bloomberg” миллиардерлар индексида унинг бойлиги жорий йилда 13,6 миллиард долларга ошиб, 27 март ҳолатига кўра 57,5 миллиард долларга баҳолангани қайд этилган.

Чжан Имин Хитойнинг энг бой одамлари рўйхатида Tencent Holdings технологик компанияси ҳаммуассиси Пони Ма (56,6 миллиард доллар) ва Nongfu Spring ичимлик сувлари ва алкоголсиз ичимликлар ишлаб чиқарувчи компания раҳбари Чжун Шаншанни (54,1 миллиард доллар) ортда қолдирган. 

Осиёдаги энг бой одамлари рўйхатида Чжан Имин эндиликда ҳиндистонлик тадбиркорлар Мукеш Амбани (90,9 миллиард доллар) ва Гаутам Адани (72,3 миллиард доллар) дан кейинги учинчи ўринни эгаллади. 

Чжан Иминнинг асосий бойлиги ByteDance технологик компаниясидаги улушига боғлиқ. ByteDance TikTok ва Douyin каби машҳур платформаларга эгалик қилади. 2024 йил май ойида Чжан Имин компаниянинг 21 фоиз акцияларига эгалик қилган. “Bloomberg” маълумотларига кўра, ByteDance’нинг фойдаланувчилари сони 1 миллиарддан ортиқ. 2023 йилда компаниянинг даромади 110 миллиард доллардан ошган.

ByteDance 2012 йилда Чжан Имин ва Лян Рубо томонидан ташкил этилган. Компаниянинг бош қароргоҳи Пекин шаҳрида жойлашган. 2021 йилда Чжан Имин бош ижрочи директор лавозимидан истеъфога чиққан, бир неча ой ўтиб эса, бошқарув кенгаши раиси лавозимини ҳам тарк этган.

Хитойда ByteDance сунъий интеллект соҳасининг етакчиларидан бири ҳисобланади. Компаниянинг сунъий интеллектга асосланган Doubao чат-боти 75 миллион фаол фойдаланувчига эга. Шунингдек, компания тасвирларни таниб олиш модели бозор ўртача нархидан 85 фоиз арзонроқ эканини ва DeepSeek билан таққослаш мумкинлигини таъкидламоқда.

Эслатиб ўтамиз, аввалроқ 2024 йилда энг бой 500 кишининг умумий бойлиги 10 триллион доллардан ошиши хабар қилинганди. Маълумотларга кўра, ўсиш бўйича дастлабки ўринларни Илон Маск, Марк Цукерберг ва Женсен Ҳуанг эгалламоқда. Улар Tesla, SpaceX, Meta ва Nvidia компанияларини бошқаради. Улардан кейин Oracle компаниясининг асосчиси ва собиқ бош ижрочи директори Ларри Эллисон, Amazon асосчиси Жефф Безос, Dell раҳбари Майкл Делл ва Google асосчиси Ларри Пейж ва Сергей Брин келмоқда.