Tesla арзонроқ электромобилларни тақдим этди

Кеча, 7 октябрь куни Tesla ўзининг иккита энг машҳур электромобиль моделининг янги версияларини тақдим этди. Улар олдинги версияларга қараганда тахминан 5 000 АҚШ доллар арзонроқ сотилади. Бу ҳақда “The New York Times” хабар берди.

Қайд этилишича, Илон Маскнинг электромобиль ишлаб чиқарувчи компанияси янги моделларининг нархи тахминан 37 000 ва 40 000 доллардан бошланишини маълум қилган. Унга кўра, янги Model Y 40 000 долларга, Model 3 эса 37 000 долларга баҳоланмоқда. Бу нархлар компания автомобилларини қиймат жиҳатидан бензинли транспорт воситаларига яқинлаштиради. 

Шунингдек, баъзи таҳлилчилар ва сармоядорлар Tesla'ни GM ҳамда BMW каби анъанавий автомобиль ишлаб чиқарувчилари, бундан ташқари, турли хил электр транспорт воситаларини таклиф қилаётган BYD каби Хитойдан янги рақобатчиларнинг рақобатига жавобан янги моделларни тақдим этмаётгани учун танқид қилган. Қайд этиш жоиз, BYD дунёдаги энг йирик электр автомобиль ишлаб чиқарувчи сифатида Tesla’дан ўзиб кетмоқда. 

Маълумот ўрнида, Tesla Model 3 ва Model Y янги версияларининг  солиқ имтиёзлари аввалгиларига қараганда қимматроқ бўлади. Аммо солиқ имтиёзлари йилига 150 000 доллардан ортиқ даромад оладиган жисмоний шахслар ёки умумий йиллик даромади 300 000 доллардан ортиқ бўлган никоҳдаги жуфтликлар учун берилмаган.

Эслатиб ўтамиз, аввалроқ Миллий статистика қўмитаси жорий йилнинг 1 апрель ҳолатига кўра, Ўзбекистон Республикасида 65,2 мингта электромобиль рўйхатга олингани ҳақида хабар берган эди.

Камола Сотволдиева