Терма жамоанинг ўйини учун Ўзбекистон чемпионати ўйинлари бошқа санага кўчирилди

2-10 июнь саналари FIFA кунлари сифатида белгиланган бўлиб, унинг доирасида Ўзбекистон миллий терма жамоаси 5 июнь куни Абу Дабида БАА ҳамда 10 июнь куни Тошкентда Қатар термаларига қарши майдонга тушади. Бўлажак ўйинларга Ўзбекистон терма жамоаси тайёргарликни эртароқ бошламоқчи ва шу муносабат билан Ўзбекистон чемпионатининг 12-тур беллашувлари бошқа санага кўчирилди. Бу ҳақда Ўзбекистон Профессионал футбол лигаси (ЎзПФЛ) матбуот хизмати хабар берди.

“БАА билан учрашув мамлакат футболи тарихига кириши мумкин. Мазкур учрашувдаги дуранг натижа ҳам жамоамизни мундиал сари етаклайди. Шундан келиб чиқиб, бош мураббий Темур Кападзе Абу Дабидаги беллашувга жиддий тайёргарлик кўришни режалаштирган. Жумладан, терма жамоамиз сафарга одатдагидан эртароқ йўл олиб, тайёргарликни Амирликларда давом эттиришни мақсад қилган”, дейилади хабарда.

Маълумки, май ойининг сўнгги 10 кунлигида легионер футболчилар ҳам терма лагерига эртароқ етиб келиши мумкин. Бу ўз навбатида Кападзега жамоани эртароқ йиғиш имкониятини тақдим этади. Шундан келиб чиқиб, ассоциация ва лига ўзаро келишган ҳолда Суперлиганинг 12-тур беллашувларини ҳам ФИФА кунидан кейинга кўчиришга қарор қилди. Бу ўз навбатида Суперлигада иштирок этаётган футболчилар терма ихтиёрига эртароқ етиб боришини таъминлайди. 

Бунда Суперлига ўйинларининг дам олиш кунларига тўғри келиши ва кубок учрашувлари ҳафта ўртасида бўлиб ўтиши принципи сақлаб қолинган бўлиб, мамлакат кубогининг 1/4 финал босқичи август ойига кўчирилган. 

“Ишонамизки, мамлакатимиз бош жамоаси июнь ойида барча ўзбекистонликлар учун мундиал чиптасини совға қилади”, дейилади манба хабарида.