Техасда тошқин қурбонлари сони 80 кишига етди

АҚШнинг Техас штатида кучли ёмғирлар туфайли юзага келган тошқин оқибатида камида 80 киши ҳалок бўлган, уларнинг 28 нафари болалар. Бу ҳақда CNN хабар берди.

Кеча, 6 июль куни оқшом Техаснинг Керр округи шерифи Ларри Литанинг журналистларга маълум қилишича, фақатгина ушбу округда тасдиқланган ўлим ҳолатлари сони 68 тага етган. Уларнинг 40 нафари катталар ва 28 нафари болалар. CNN манбаларига кўра, яна бешта округда 12 киши ҳалок бўлган.

Штатнинг бир нечта округларида фавқулодда ҳолат эълон қилинган. Ҳудудларда кўплаб йўллар вайрон бўлган, телефон линиялари ишламаяпти. Яна 41 киши, жумладан 10 нафар қиз бола бедарак йўқолган деб эълон қилинган.

Ҳалок бўлган ва бедарак йўқолган болалар Керрвилл шаҳри яқинидаги Гуадалупе дарёси бўйида жойлашган Camp Mystic – қизлар учун мўлжалланган ёзги оромгоҳда дам олаётган бўлган. Дарё кучли ёмғирдан сўнг тўсатдан тошган.

Миллий метеорология хизмати (NWS) Техас жанубий марказидаги Комал округида ҳам тошқин хавфи ҳақида огоҳлантириш берган. Хизмат баёнотида айтилишича, жуда секин ҳаракатланаётган момақалдироқ 1 соати ичида 100-150 мм ёмғир ёғишига сабаб бўлмоқда.

NWS ҳалокат зонасига яқин жойларда яшовчиларни баландроқ ҳудудларга чиқиб кетишга, бошқа фуқароларни эса имкон борича тез эвакуация қилишга чақирган.

“Биз фавқулодда ва ниҳоятда оғир вазиятга дуч келмоқдамиз”, дейилади NWS огоҳлантиришида.

АҚШ Президенти Дональд Трамп маъмурияти штат раҳбарияти билан яқиндан ҳамкорлик қилаётганини айтди. Унинг топшириғига биноан, АҚШ Ички хавфсизлик вазири Кристи Ноэм Техасга юборилган.

Ноэм Техасга етиб борганидан сўнг матбуот анжуманида Трамп юз берган талафотлардан чуқур қайғуда эканини айтиб, уни ва Мелания Трампнинг ҳамдардлигини етказган. Президент федерал ҳукумат барча зарур ресурсларни сафарбар қилишга тайёрлигини билдирган.

Ноэмнинг айтишича, маҳаллий қутқарувчилар ҳудудни яхши билгани сабабли энг самарали куч ҳисобланади, бироқ федерал ҳукумат уларга максимал ёрдам кўрсатиши лозим.

Эслатиб ўтамиз, аввалроқ Техас штатида кучли жала ёмғири туфайли юзага келган сув тошқинлари оқибатида камида 24 киши ҳалок бўлгани хабар қилинганди.