Тебинбулоқда кон-металлургия комплекси қурилади

Жамият 1489
image

Кеча, 20 август куни Ўзбекистон Президенти Шавкат Мирзиёев Қораўзак туманидаги Тебинбулоқ кони негизида кон-металлургия комплексини қуриш лойиҳаси билан танишди.

Бу конда 1,1 миллиард тонна хомашё резерви аниқланган. Дастлабки ҳисоб-китобларга мувофиқ, йилига 33 миллион тонна руда қазилиб, ундан 1,5 миллион тонна темир олиниши мўлжалланган.

Президентнинг 2018 йил 12 январдаги қарорида ушбу инвестиция лойиҳасини амалга ошириш чоралари белгиланган.

Кон-металлургия комплекси йилига 900 минг тонна арматура, 225 минг тонна сим, 375 минг тонна уголок, швеллер ва бошқа материаллар ишлаб чиқариш қувватига эга бўлади. Бу катта миқдордаги импорт ўрнини тўлдириб, саноатни барқарор ривожлантиришга хизмат қилади. Бу ерда 2 мингдан зиёд киши ишлайди. Маҳсулотларнинг 35 фоизини экспорт қилиш ҳам режалаштирилган.

Лойиҳани тайёрлаш ва амалга оширишга Германиянинг "DMT-Group Consulting" ва Австриянинг "Horst Wiesinger Consulting" корхоналари жалб этилган. 

Президент ушбу компаниялар мутахассислари билан суҳбатлашди. Мажмуа қурилишига илмий жиҳатдан пухта ёндашиш, темирдан маҳсулот ишлаб чиқариш соҳасида ҳам ўзига хос мактаб яратиш кераклигини таъкидлади. 

Давлат раҳбари лойиҳанинг техник-иқтисодий асосларини мукаммал ишлаб чиқиш, уни амалга оширишга кўпроқ ёшларни жалб этиш бўйича кўрсатмалар берди.

Суннатилла Абдуллаев
Мақолага баҳо беринг
Баҳолаганлар: 12
Рейтинг: 3.4
t
×