ТДЮУ талабаларига ўқитувчиларни танлаш имконияти берилди

Жорий йил 10 июнда Вазирлар Маҳкамасининг “Ўзбекистон Республикаси Адлия вазирлиги тизимидаги таълим муассасаларида кредит-модуль тизимини жорий этиш чора-тадбирлари тўғрисида”ги 359-сон қарор қабул қилинди.

Қарор билан Тошкент давлат юридик университетида ҳамда Адлия вазирлигининг юридик техникумларида таълимнинг кредит-модуль тизимида ўқув жараёнини ташкил этиш тартиби тўғрисидаги низомлар тасдиқланди.

ТДЮУ ҳамда Адлия вазирлигининг юридик техникумларида таълимнинг кредит-модуль тизимида ўқув жараёнини ташкил этишнинг қуйидаги тизими жорий этилади:

•    ўқув режаси мажбурий ва танлов фанлари асосида ишлаб чиқилади ҳамда таълим олувчига ўзининг таълим дастурини мустақил шакллантириш имконияти яратилади;
•    таълим олувчи томонидан муайян модуль (фан) бўйича ўзлаштирилган ўқув юкламаси кредитлар асосида ҳисобланади;
•    Адлия вазирлиги юридик техникумларида ўқув йили (семестр) бошида ўқувчиларнинг шахсий таълим траекторияси шакллантирилади, ўқувчилар фан (модуль) ва ўқитувчиларни танлаш бўйича рўйхатдан ўтказилади ҳамда академик гуруҳлар шакллантирилади;
•    ҳар ўқув йилида ўқув режасига мувофиқ дарс жадвали шакллантирилади ва ўқув жараёни амалга оширилади ҳамда доимий равишда таълим натижалари бўйича талабанинг кредитлари ҳисобланади.

2021–2022 ўқув йилидан бошлаб ТДЮУда таълимнинг кредит-модуль тизими тўлиқ жорий этилади, бунда ТДЮУ таълим дастури каталоги ва ўқитиш шароитлари тўғрисидаги маълумотлар ҳамда долзарб ахборотлар унинг расмий веб-сайтида таълим бериладиган барча тилларда ўқув йили бошланишидан камида бир ой олдин жойлаштирилади ва доимий равишда янгилаб борилади.

Хорижий олий таълим муассасаларида ўқишни давом эттирган ва уни муваффақиятли тамомлаган шахсларга хорижий олий таълим муассасаларининг белгиланган шаклда берилган дипломлари (бакалавриат, магистратура) қўшимча маъмурий тартиб-таомилларсиз олий таълим тўғрисидаги ҳужжат сифатида тан олинади.

ТДЮУ Кенгаши қарорига мувофиқ талабаларга фан доирасида профессор ўқитувчиларни танлаш имконияти берилади. Бунда талабалар таълим жараёнини бошқариш ахборот тизими портали орқали ўқув семестри бошида танланган профессор ўқитувчининг машғулотида иштирок этиш учун онлайн тарзда рўйхатдан ўтади. 

ТДЮУ ўқув жараёнида кредит-модуль тизими Кредит тўплаш ва кўчиришнинг Европа моделига (ECTS) мувофиқ ташкил этилади. Ўқув йили учун таълим дастури бир ёки бир нечта модулдан иборат бўлади ҳамда ТДЮУ Кенгаши томонидан тасдиқланади.

Кредит-модуль тизимида 1 кредит ўртача 25–30 соатлик ўқув юкламасига тенг бўлади. Яъни талаба муайян фандан тегишли кредитларни тўплаши учун маълум миқдордаги ўқув юкламасини ўзлаштириши зарур.

Ўқув юкламаси қуйидагича тақсимланади:

• бакалавриатда – 40–50 фоиз аудитория соати, 50–60 фоиз мустақил иш соатига;
• магистратурада – 30–40 фоиз аудитория соати, 60–70 фоиз мустақил иш соатига.

Шунингдек ўқув дастурига мувофиқ битирувчиларнинг амалиётни ўташи ва якуний давлат аттестациясидан ўтиши учун кредитлар ажратилади.

Кредитнинг соатлардаги миқдори ва ўқув юкламаси миқдори ТДЮУ кенгаши томонидан белгиланади ҳамда ТДЮУ веб-сайтида жойлаштирилади. Талаба бир семестрда 30 кредит ҳамда бир ўқув йилида 60 кредит тўплаши талаб этилади.