Тайвань Хитойга қарши мудофаа тизимини кучайтирмоқчи

north_east

Хитой Ўзбекистонни Тайвань масаласида огоҳлантиргани маълум бўлди

Тайвань Хитойдан келиши мумкин бўлган хавфларга қарши туриш учун қўшимча 40 миллиард долларлик мудофаа харажатларини режалаштирмоқда. Бу ҳақда “Reuters” хабар берди.

Маълум қилинишича, 2026 йилда ҳукумат мудофаа учун 949,5 миллиард Тайвань доллари (тахминан 30,3 миллиард АҚШ доллари) ажратмоқчи. 2030 йилга келиб бу маблағ 39,89 миллиард долларга етиши кўзда тутилмоқда. Аммо бу режа ҳали парламент томонидан тасдиқланиши керак.

Тайвандаги энг йирик мухолифат партияси – Гоминдан раҳбари Чжен Ли Вун аввал ҳам мудофаа харажатларининг оширилишига қарши чиққан. Бу сафар у бюджетга қарши овоз беришини аниқ айтмаган бўлса-да, президент Лай Чинг-те'ни “бу қарордан воз кечишга” чақирди.

“Биз урушдан узоқ бўлишни, урушдан қочишни истаймиз”, деди Чжен партия йиғилишида.

Бу муносабат Япониянинг Бош вазири Санаэ Такаити Хитойнинг Тайванга эҳтимолий ҳужуми Япония томонидан ҳарбий жавобга сабаб бўлиши мумкинлигини айтганидан сўнг билдирилди. Оқибатда Хитой ва Япония ўртасида Тайвань масаласидаги кескинлик кучайди.

Пекин эса Тайваннинг “ташқи кучларга ортиқча таянаётгани”ни танқид қилди. 

“Халқ ҳаётини яхшилашга сарфланиши мумкин бўлган маблағлар қурол-яроғ сотиб олишга кетмоқда. Бу Тайванни фалокатга етаклайди”, деди Хитойнинг Тайван ишлари бўйича идораси вакили.

Тайвань етакчиси Лай Чинг-те эса АҚШ билан алоқалари мустаҳкамлигини таъкидлаб, Президент Трампнинг: “Тайвань бу – Тайвань”, деган сўзларини мисол келтирди. Унинг айтишича, бу изоҳнинг ўзи АҚШнинг муносабатини кўрсатиб турибди.

Лайнинг фикрича, Тайваннинг келажагини фақат ўз халқи ҳал қилиши мумкин. Пекин эса Лайнинг мулоқот ҳақидаги таклифларини бир неча бор рад этиб, уни “айирмачи” деб атаган.

Маълумот учун, АҚШ ва Тайвань ўртасида расмий дипломатик алоқалар бўлмаса ҳам, АҚШ Тайванга мудофаа воситаларини етказиб бериши шарт. Шунга қарамай, Дональд Трамп президентликка келганидан бери Тайванга фақат бир марта қирувчи самолётлар ва эҳтиёт қисмлар учун 330 миллион долларлик қурол-аслаҳа пакети маъқулланган.

“Reuters”га кўра, АҚШ Хитойнинг ҳарбий босимини камайтириш мақсадида Тайванга қурол етказиб беришни янада кучайтиришни режалаштирмоқда.

Эслатиб ўтамиз, олдинроқ Хитой фуқаролик флотини Тайванга қарши операцияга тайёрлаётгани ҳақида хабар берилганди. Ўшанда тайёргарлик кўлами Иккинчи жаҳон урушидаги Нормандия операциясидан ҳам ошиши мумкинлиги айтилганди.

Комила Қобилова