Тарихий хотиралар учун Фьюридан миннатдорман – Уайлдер

Спорт 1672
image

Профессионал бокснинг супер оғир вазн тоифасида собиқ Жаҳон чемпиони Деонтей Уайлдер (42-2-1) Тайсон Фьюридан (31-0-1) учралган мағлубиятидан сўнг, Instagram саҳифасида биринчи марта жанг ҳақида изоҳ қолдирди. 

“Аввало, Яратганга дунёда қатъият ва эҳтирос билан яшашга изн бергани учун шукрона келтирмоқчиман. Шунингдек, ўз жамоамга ва доимо қўллаб қувватлаган мухлисларга раҳмат айтаман. Тушкунликка тушмадим, десам ёлғон бўлади. Аммо энди тушундимки, бу йўл мен кутганимдан мураккаброқ экан. Тайсон Фьюрини ғалаба билан табриклайман ва абадий ёдда қоладиган тарихий хотиралар учун миннатдорман”, дейди Уайлдер.

Шунингдек, “бронза бомбардимончи” мағлубият боксчининг ўсишига ёрдам беришини айтиб ўтган:

“Албатта, ғалаба қозона олмадим, лекин бир инсон ғалаба – онгнинг бир қисми эканини айтди. Баъзида ғалаба қозониш учун ютқизиш керак. Мен мухлисларнинг қувончини кўришни хоҳлайман. Умид қиламанки, ўзимни жангчи ва ҳақиқий спорт қироли сифатида кўрсата олдим”.

Эслатиб ўтамиз, 36 ёшли Деонтей Уайлдер жорий йил 10 октябрь куни ўтказилган жангнинг 11-раундида Тайсон Фьюрининг кучли зарбасидан сўнг, нокаут ҳолатига тушган ва баҳс давомида қўлини синдириб олганди. У жанг якунига етгач, шифохонага олиб кетилган ва шифокорлар хулосасига кўра олти ой давомида рингга кўтарила олмаслиги маълум қилинди. 

Маълумот учун, ашаддий рақиби устидан ғалаба қозонган “Лўлилар қироли” эса 45 кунлик “таътил”га чиқди. Бунга қадар боксчилар икки бор ўзаро тўқнаш келган. Илк жангда кучлар тенг келган бўлса, иккинчи қарама-қаршиликда Тайсон рақибини нокаутга учратган эди.
 

Ҳумоюн Орипов
Мақолага баҳо беринг
Баҳолаганлар: 8
Рейтинг: 2.8
t
×