“Тахтақорача” довонида пулли туннель қурилади

Жорий йилда “Тахтақорача” довони орқали ўтадиган пулли туннель қурилиши бўйича келишув имзоланиши режалаштирилмоқда. Бу ҳақда кеча, 11 июль куни Транспорт вазири Илҳом Маҳкамов парламент йиғилиши давомида депутатнинг саволига жавобан маълум қилди.

Вазирнинг сўзларига кўра, Президент Самарқанд ва Қашқадарё вилоятларига ташрифи чоғида Транспорт вазирлигига “Тахтақорача” довонида 7 км узунликдаги пуллик туннель қуриш вазифасини қўйган. 

“Бугунги кунда учта компания лойиҳалаштириш билан шуғулланмоқда. Туннель қурилиши бир қатор қийинчиликларга эга. Бу биринчи навбатда геодезия ва геология ишларини амалга ошириш билан боғлиқ, шунинг учун бироз вақт керак бўлди”, деган вазир. 

Маҳкамовнинг қўшимча қилишича, хусусий тадбиркорлар ушбу топшириқни якунлаб, лойиҳанинг техник-иқтисодий асосларини тақдим этишга тайёргарлик кўрмоқда. 

“Август ойида учта даъвогар орасидан ғолибни аниқлаймиз ва у билан шартнома тузамиз”, деган вазир. 

Маълумот учун, довондан ташқари Ўзбекистонда Тошкент – Самарқанд ва Тошкент – Андижон йўналишлари бўйлаб пулли йўллар қурилиши тасдиқланган. Тошкент – Андижон йўналиши 2024 йилда 4,65 млрд долларга баҳоланган бўлса, Тошкент ва Самарқанд ўртасидаги йўл қиймати 1,4 млрд долларни ташкил этади.

Президент Шавкат Мирзиёев қарори билан давлат-хусусий шерикликни ривожлантириш доирасида пуллик йўллар қуриш санаси эълон қилинган эди.

Қарорга кўра, Тошкент – Самарқанд йўналиши бўйича автойўл қурилиш ишлари жорий йилда амалга оширилади. Тошкент – Андижон йўналиши бўйича автойўлини барпо этиш ишлари 2026 йилга белгиланган.