Tailand turistlar uchun vizasiz qolish muddatini qisqartirdi

Bugun, 19 may kuni Tailand Vazirlar Mahkamasi bundan ikki yil avval qabul qilingan, dunyoning 93 ta davlati fuqarolari uchun mo‘ljallangan 60 kunlik vizasiz dasturni bekor qilishni ma’qulladi. Bu haqda Thai PBS World xabar berdi.

Tailand Turizm va sport vaziri Surasak Fancharoyenvorakulning ma’lum qilishicha, mamlakat Vazirlar Mahkamasi dunyoning 93 ta davlati fuqarolari uchun 60 kunlik vizasiz dasturni bekor qilish qarorini ma’qullagan. Uning so‘zlariga ko‘ra, ushbu chora vizasiz rejimning bir nechta turidan foydalanadigan davlatlar uchun amal qilgan maxsus shartlarni ham bekor qiladi.

Turizm vaziri Tailand avvalgi 30 kunlik vizasiz kirish tizimiga qaytishini bildirgan. Uning qo‘shimcha qilishicha, Viza siyosati bo‘yicha qo‘mita xavfsizlik va iqtisodiy omillarni hisobga olgan holda, har bir davlat uchun eng munosib viza turini belgilash maqsadida viza qoidalarini qayta ko‘rib chiqadi.

Oldindan 60 kunlik vizasiz kirish imkoniyatidan mahrum bo‘lgan barcha davlatlar o‘zlarining avvalgi viza qoidalariga qaytadi, ularning aksariyati mamlakatda 30 kun davomida bo‘lishga ruxsat beradi.

Vazir, shuningdek, hukumat shunchaki tashrif buyuruvchilar sonini oshirishga emas, balki mamlakatga “sifatli turistlar”ni jalb qilishga e’tibor qaratmoqchi ekanligini qayd etgan.

Qayd etish joiz, avvalroq Tailand sayyohlar uchun vizasiz bo‘lish muddatini 30 kungacha qisqartirish niyatida ekanligi ma’lum bo‘lgan edi. Mamlakat Tashqi ishlar vazirligi ushbu muddat chet elliklar tomonidan mavjud tizimdagi bo‘shliqlardan turizmdan tashqari maqsadlarda suiiste’mol qilish holatlarini kamaytirish uchun qisqartirilayotganini bildirgan.