Сурияликлар Қурбон ҳайити арафасида уйига қайтмоқда

Сурия фуқаролари йиллар давомида уруш сабабли Туркияда яшаган бўлсалар-да, Қурбон ҳайити яқинлашар экан оммавий равишда ўз юртларига қайтишни бошлади. Бу ҳақда “Anadolu” хабар берди.

Маълум қилинишича, Туркиянинг Килис вилоятидаги Онжупинар чегара пункти ватанига қайтишни истаган сурияликлар билан тўлиб-тошган.

“Улар Сурия ҳудудига доимий равишда қайтиш учун керакли ҳужжатларни расмийлаштирмоқда”, дейилади хабарда.

25 ёшли Аҳмад Исмоил нашрга берган интервьюсида 7 йил аввал уруш туфайли Сурияни тарк этгани ва Туркияда бошпана топганини айтган.

“Бу йиллар давомида қалбан ватанимда эдим. Уруш тугади, мен эса қайтяпман. Президент Ражаб Тойиб Эрдўғанга ва турк халқига миннатдорчилик билдираман. Қурбон ҳайитини ватанда нишонлаш бахтини бошдан кечирмоқдаман”, деган у.

Қолаверса, 19 ёшли Экрем Умар ҳам уруш тугаганидан сўнг ватанига қайтиш қарорини қабул қилганини айтган.

“Байрамни оилам билан ўз юртимда ўтказишдан жуда хурсандман”, деган юртига қайтаётган фуқаро.

23 ёшли Зайд Ал-Жубайди эса урушдан қочиб Туркияга келгани ва эндиликда ўз ҳудудида тинчлик тикланганидан сўнг ватанига қайтаётганини билдирган.

“Оиламни 4 йилдан бери кўрмаган эдим. Уларни яна кўриш ва байрамни бирга ўтказиш қувончини бошдан кечиряпман. Туркияга ва турк халқига ҳар доим раҳмат”, дея сўзини якунлаган у.

Асаднинг ағдарилиши

2024 йилнинг ноябрь ойи охирида “Ҳаят Таҳрир аш-Шом” гуруҳи Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Ҳама ва Ҳомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Собиқ президент Башар Асад эса оиласи билан мамлакатдан қочиб кетди ва Россиядан бошпана олди. Мамлакатга янги ҳокимият ўрнашгач, Россиядан бир неча марта собиқ президентни топширишни сўради, аммо Россия ҳукумати бу сўровларни рад этди.

Эслатиб ўтамиз, Башар Асад режими ағдарилгандан сўнг мамлакатда ҳаёт қайтгандек бўлди. Ҳокимиятга келган “Ҳаят Таҳрир аш-Шом” минтақада бир неча ўзгаришлар, хусусан, ҳижоб чеклови, қаттиқ жазолашни бекор қилди. Кўчаларда кўплаб пиёдалар ва машиналар ҳаракатлана бошлади, баъзи дўкон ва ресторанлар очиқ. Қолаверса, Европа Иттифоқи кенгаши Сурияга нисбатан қўлланилган барча иқтисодий чеклов чораларини (фақат хавфсизлик билан боғлиқ санкциялар бундан мустасно) бекор қилиш тўғрисида юридик ҳужжатларни қабул қилди.