Суриядаги сайловлар натижаси эълон қилинди

Сурияда собиқ президент Башар Асад ҳукумати ағдарилганидан кейинги илк парламент сайловларининг дастлабки натижалари эълон қилинди. Бу ҳақда “Al Jazeera” хабар берди.

Маълум қилинишича, янги парламент доимий Конституция қабул қилиниб, умумхалқ сайловлари ўтказилгунга қадар фаолият юритади.

Умуман олганда, Халқ мажлисига 210 депутат танланади: уларнинг 140 нафари, яъни учдан икки қисми сайловчилар коллегияси томонидан билвосита сайланади, қолган 70 нафарини эса муваққат президент Аҳмад аш-Шара тайинлайди.

Хавфсизлик ва сиёсий сабабларга кўра, ҳукумат учта вилоятда – курдлар назоратидаги Раққа ва Хассака ҳамда ҳукумат қўшинлари билан друз жангарилари ўртасида тўқнашувлар бўлиб ўтган Сувайда вилоятларида овоз беришни кейинга қолдирган.

5 октябрь куни бўлиб ўтган сайлов натижасида 119 нафар депутат сайланган, Халқ мажлисидаги 21 та ўрин ҳозирча бўш қолмоқда. Яна 70 нафар депутатни президент шу ҳафта тайинлаши режалаштирилган.

Янги парламент таркибига олти нафар аёл кирган. Маҳаллий сайлов комиссияси илгари аёллар 1500 дан ортиқ номзодларнинг 14 фоизини ташкил этганини билдирган эди.

10 та ўрин диний ва этник озчилик вакилларига, жумладан, курдлар, насронийлар ва икки нафар алавийларга насиб этган.

Марказий сайлов комиссияси вакили Навар Неджме матбуот анжуманида 119 нафар сайланган депутатнинг атиги 4 фоизи аёллар эканини айтиб, бу кўрсаткич Сурия жамиятида аёлларнинг тутган ўрни ва сиёсий, иқтисодий ҳамда ижтимоий ҳаётдаги роли билан мутаносиб эмаслигини таъкидлаган.

Шунингдек, у ғолиблар орасида атиги икки нафар насроний борлигини айтиб, бу натижани Суриядаги насронийлар улуши нуқтайи назаридан “заиф вакиллик” деб баҳолаган.

Эслатиб ўтамиз, ўтган ойда Сурия муваққат президенти Аҳмад аш-Шара БМТ Бош Ассамблеясининг 80-юбилей сессиясидаги тарихий нутқида ўз мамлакатининг ўтган авлод зулмидан воз кечаётганини эълон қилиб, Сурияга нисбатан қўлланган санкцияларни тўлиқ бекор қилишни талаб қилганди.