Сурияда Туркияга қарши намойишларда етти киши ҳалок бўлди

Кеча, 1 июль куни Суриянинг шимоли-ғарбий ҳудудида юзага келган Туркияга қарши намойишларда камида етти киши ҳалок бўлди, 20 дан ортиқ киши яраланди. Бу ҳақда Сурия Инсон ҳуқуқлари мониторинги маркази маълум қилди.

Ташкилотга кўра, намойишларда юзлаб одамлар иштирок этган, уларнинг бир қисми қуролланган. Улар Туркия байроқларини йиртиб ташлаган. Африн ва Жарабулус шаҳарларида намойишчилар билан турк аскарлари ўртасида тўқнашувлар бўлиб, бу эса ўлим ҳолатига олиб келган. 

Намойишлардан бир кун олдин, 30 июнь куни Туркиянинг марказий қисмидаги Кайсери шаҳрида Сурияга қарши оммавий норозилик бўлиб ўтганди. Маҳаллий аҳоли кечқурун Суриядан келган қочқинларга тегишли дўконлар ва машиналарга ўт қўйди. Оқибатда Кайсеридаги тартибсизликларда 14 нафар полициячи ва бир ўт ўчирувчи тан жароҳати олди. 67 киши ҳибсга олинган.

Норозилик кайфиятига 26 ёшли суриялик йигитнинг етти ёшли қизга нисбатан жинсий зўравонлик қилгани сабаб бўлган. Кейинроқ маълум бўлишича, қизча ҳам суриялик оиладан бўлган. Маҳаллий полиция бошлиғи намойишчиларга эркакка барча қонуний чоралар қўлланилиши, жумладан, уни депортация қилишга ваъда берган. Туркия Ички ишлар вазири Али Ерликая эса қиз ва унинг оиласи Туркия давлати ҳимоясига олинганини қўшимча қилди.