Спортдан мансабдорликкача. Ўз ҳаётини ҳукуматга бахшида қилганлар

Спортчилик фаолиятида муваффақият қозонган ва ўз юртини дунёга танитган спортчилар кун келиб ўз мамлакатининг президенти, ҳукумат доирасидаги амалда фаолият олиб боргани ҳақида эшитганмисиз? QALAMPIR.UZ мана шундай спортчилар ҳақида мақола тайёрлади ва кузатувчиларга тақдим этади.

Жорж Веа

Африкалик футболчилар орасидаги ягона “Олтин тўп” соҳиби Жорж Веа футболчилик фаолияти давомида “Монако”, ПСЖ, “Милан” каби клубларда тўп тепган. Спортдаги эришган муваффақиятларидан кейин у ўз туғилиб ўсган юрти Либериянинг президенти этиб сайланди. Бу воқеа Веанинг фаолияти якунлаганидан бир неча йиллар ўтиб, яъни 2017 йилдаги сайловда содир бўлган. Веа президентликка келган пайтда Либерия иқтисодий қийинчиликлардан ўтаётган эди. У янги йўллар қуриш, мактаб ва шифохоналарни модернизация қилишни бошлади. “Pro-Poor Agenda for Prosperity and Development”, яъни “қашшоқларга мўлжалланган тараққиёт дастури” деб номланган дастур ишлаб чиқди. Таълим соҳасида эса давлат мактабларида ўқишни бепул қилиш ташаббусини илгари сурди. Талабалар учун шартли стипендия дастурларини жорий этди. Шунча йиллик фаолиятдан кейин 2024 йилда Веа президентлик сайлови натижасига кўра лавозимини тарк этди.

Михаил Кавелашвили

Танишинг! Футболчилик фаолияти давомида Россиянинг “Алания” клубида ўзбек футболи афсонаси Миржалол Қосимов билан бирга тўп тепган амалдаги Грузия Президенти Михаил Кавелашвили. Кавелашвили, шунингдек, футболчилик фаолиятида Англиянинг “Манчестер Сити” клуби сафида ҳам ўйнаган. Спортдаги муваффақиятларидан кейин у ўз юрти Грузияда 2016 йилда мамлакат парламенти депутати лавозимида иш юритади. Аввалига ҳокимиятдаги “Грузия орзуси” партияси аъзоси бўлган Кавелашвили кейинчалик мухолифатга ўтган ва “Халқ кучи” номли янги сиёсий ҳаракатнинг етакчиларидан бири бўлди. Кавелашвили 2024 йилнинг 14 декабрида бўлиб ўтган сайлов натижаларига кўра, Грузия Президенти этиб сайланди. У ягона номзод сифатида сайловда иштирок этди ва 224 та овоз олди. Кавелашвилининг инаугурация маросими 2024 йил 29 декабрь куни парламент биносида бўлиб ўтди. У шу кундан бошлаб Грузия тарихидаги 6-президент сифатида фаолиятини бошлади.

Кахабер Каладзе

Футболчилик фаолиятида Италиянинг “Милан”и билан икки марта Европа Чемпионлар лигаси ғолиби бўлган Кахабер Каладзе эндиликда Грузия пойтахти Тбилиси шаҳри мэри ҳисобланади. Спортдаги фаолиятини якунлаган Каладзе ўз мамлакати ҳукуматида иш юрита бошлади. У 2012 йилдан 2017 йилга қадар Грузия Энергетика вазири ва Бош вазир ўринбосари лавозимида ишлади. 2017 йилга келиб, Каладзе ҳозирги лавозимига, яъни Тбилиси шаҳри мэри этиб тайинланади. 

Виталий Кличко

Боксчилик фаолиятида оғир вазн тоифасининг мутлақ жаҳон чемпиони бўлган Виталий Кличко спортдаги муваффақиятли карьерасидан кейин ўз юрти Украинада ҳукумат тизимида иш юрита бошлади. Кличко 2014 йилдан бери Украина пойтахти Киев шаҳри мэри ҳисобланади. Шунингдек, Кличко ўзи ташкил қилган партия УДАР, яъни “Український Демократичний Альянс за Реформи”нинг раҳбари ҳисобланади. 

Менни Пакьяо

Боксдаги фаолияти давомида 8 вазн тоифасида мутлақ жаҳон чемпиони сифатида рекорд қайд этган Менни Пакьяо спортдаги фаолиятини якунлаганидан кейин ўз юрти Филиппинда Сенат аъзосига айланди ва мамлакат сиёсатида ҳам фаолликни оширди. Ҳаттоки, Пакьяо 2022 йилда мамлакат президентлиги учун ўз номзодини илгари сурди, аммо сайловда ғалаба қозона олмади. 

Арнольд Шварценеггер

Бодибилдинг бўйича 7 карра “Mr. Olympia” номини қўлга киритган спортчи ва актёр Арнольд Шварценеггер 2003 йилда Республикачи партиясидан номзод бўлиб, Калифорния штати губернатори этиб сайланган. У бу лавозимда 2011 йилга қадар ишлади.

Кватемок Бланко

Мексика футболи афсонаси бўлган Кватемок Бланко футболчилик фаолиятини якунлаганидан кейин ўз юрти Мексикада сиёсий фаолиятини юрита бошлади. У 2016 йилдан 2018 йилга қадар Куернавака штати ҳокими лавозимида ишлади. 2018 йилдан ҳозирга қадар Бланко Морелос штатининг губернатори ҳисобланади.

Пеле

Футбол қироли, Бразилия терма жамоаси билан уч карра Жаҳон чемпионатида зафар қучган Пеле футболчилик фаолиятини якунлаганидан кейин ўз юрти Бразилияда сиёсий фаолиятини бошлаган. Пеле 1995 йилдан 1998 йилга қадар Бразилия Спорт вазири лавозимида ишлаган.

Ромарио

Бразилия футболининг яна бир афсонаси Ромарио 1994 йилда миллий терма жамоа билан мундиалда ғолиб чиққан. Ромарио футболчилик фаолиятини якунлаганидан кейин 2011 йилдан 2015 йилга қадар федерал депутат, 2015 йилдан ҳозиргача Рио-де Жанейро сенатори лавозимида фаолият олиб бормоқда.

Конор Макгрегор

Икки вазн тоифасида собиқ UFC чемпиони, замонавий аралаш яккакурашлар спорт тури юлдузи Конор Макгрегор спортдаги фаолиятини якунламасдан туриб, сиёсатга яхшигина аралашмоқда. Яқиндагина у АҚШ Президенти Дональд Трамп билан учрашув чоғида Ирландия президентлигига ўз номзодини қўйишини айтганди.