Собиқ президентнинг ўғли вафот этди

АҚШнинг 40-президенти Рональд Рейганнинг ўғли Майкл Рейган 80 ёшида Лос-Анжелесда вафот этди. Бу ҳақда ABC News телеканали хабар берди.

Телеканалга кўра, Майкл Рейган 4 январь яқинлари қуршовида ҳаётдан кўз юмган. Қайд этилишича, Рейган узоқ давом этган онкологик касаллик билан курашдан сўнг вафот этган.

Маълумот учун, Майкл Рейган АҚШ собиқ президенти Рональд Рейган ва унинг биринчи рафиқаси, актриса Жейн Уаймен томонидан 1945 йил 18 мартда туғилганидан кўп ўтмай асраб олинган. Ушбу никоҳдан яна икки фарзанд бўлган: Морин Рейган (у 2001 йилда вафот этган) ва чақалоқлик даврида оламдан ўтган Кристин Рейган. Рональд Рейганнинг иккинчи рафиқаси Ненси Рейган билан бўлган никоҳидан эса яна икки фарзанди бор – Патти Девис ва Рон Рейган.

Майкл Рейган консерватив сиёсий шарҳловчи сифатида танилган, у миллий миқёсда эфирга узатиладиган радио бошловчиси, бир нечта китоблар муаллифи ва жамоатчилик олдида тез-тез чиқиш қилган нотиқ бўлган. Рональд Рейган номидаги Президент кутубхонаси фонди ва институти уни отасининг сиёсий ва маънавий меросини изчил сақлаб келган шахс сифатида таърифлаган.

Эслатиб ўтамиз, аввалроқ франциялик актриса, қўшиқчи ва жамоат фаоли Брижит Бардо 92 ёшида вафот этганди.