“Сиздан угина, биздан бугина”. Трамп НАТОдан ёрдам кутмоқда

АҚШ Президенти Дональд Трамп Оқ уйда журналистлар саволларига жавоб берар экан, НАТОга аъзо Европа давлатларини Украинадаги вазият учун танқид қилди. Унинг бу ҳақдаги сўзларини Оқ уй келтирди.

“Биз уларга Украина масаласида ёрдам бердик. Улар Украинада тартибсизлик қилиб қўйишди, тўлиқ тартибсизлик, биз эса уларга ёрдам беряпмиз. Биласиз, бизни океан ажратиб туради”, деган Трамп.

Унинг таъкидлашича, собиқ АҚШ президенти Жо Байден Украина учун 350 миллиард доллар ажратган ва бу «телбалик» бўлиб, урушнинг давом этиш сабабларидан бири бўлган.

Шунингдек, Трамп Германия канцлери Фридрих Мерцни ҳам танқид қилиб, Берлин Украинадаги можарога кўпроқ эътибор қаратиши кераклигини, АҚШ ва Эрон ўртасидаги қарама-қаршиликка аралашмаслиги лозимлигини айтган.

Ўз навбатида, Мерц Вашингтон ва Теҳрон ўртасидаги музокараларни самарасиз деб баҳолаб, Эрон АҚШни “камситаётганини” билдирган.

Эслатиб ўтамиз, аввалроқ Дональд Трамп Эронга қарши урушни қўллаб-қувватлашдан бош тортган НАТО давлатлари рўйхатини тузгани ва уларга таъсир ўтказиш чораларини кўраётгани ҳақида хабар берилган эди.