Сиздан угина, биздан бугина. АҚШ Польшага шарт қўйди

Америка Қўшма Штатлари Польшага “Темир гумбаз” ҳаво ва ракетага қарши мудофаа тизимларини етказиб бериши эвазига Варшавадан Patriot зенит-ракета комплексларининг бир қисмини Украинага беришни талаб қилмоқда. Бу ҳақда “Politico” нашри хабар берди.

Қайд этилишича, бу схеманинг муаллифи АҚШ сенатори Крис Ван Холлен бўлиши мумкин. У бу режани Пентагонда Сенатнинг маблағлар бўйича расмийлари учун ёпиқ брифингида муҳокама қилган. Ван Холлен Польшани таклиф қилинган схема бўйича истиқболли ҳамкор сифатида кўришини айтган. 

"Польша ўзининг Patriot тизимларини Украинага жойлаштириши мумкин, биз [АҚШ] аллақачон Patriot тизимларини жойлаштирганмиз. Бундай алмашиш одатий ҳолдир, чунки ҳозирча иккита “Темир гумбаз” батареяси АҚШ қўлида қолмоқда", деган Ван Холлен.

Манбага кўра, бундай таклифлар Капитолий тепалигидаги Киевга Америка бюджетидан катта молиявий ёрдам кўрсатиш истиқболлари ҳақидаги пессимизмни акс эттиради.

Таъкидлаш жоизки, олдинроқ Польша Бош вазири Матеуш Моравецкий унинг мамлакати бундан кейин  Украинага қурол бермаслигини, чунки у ўз давлатини қуроллантираётганини айтган. Кейинчалик, ҳукумат Krab гаубицаларини етказиб бериш бўйича шартнома ҳали ҳам амалда эканига аниқлик киритган. Польша Президенти Анжей Дуда эса Варшава Украинани эски ҳарбий техника билан таъминлашга тайёрлигини билдирган. Бироқ у Украинага ҳар қандай янги техникаларни бериш мумкин эмас, деб ҳисоблайди.

Маълумот учун, “Темир гумбаз” Исроилнинг Rafael Advanced Defence Systems компанияси томонидан АҚШ кўмагида ишлаб чиқилган мудофаа тизими саналади. Исроил ундан 2011 йилдан бери фойдаланиб келади. Ушбу тизим шаҳарни ўққа тутилишдан ҳимоя қилади. Агар ракета ёки дрон аҳоли пунктлари томон учмаса, тизим буни эътиборсиз қолдиради. “Темир гумбаз”нинг ҳарбий кемаларни ҳимоя қилиш учун мўлжалланган версияси ҳам мавжуд. Олдинроқ Украина ва АҚШ Исроилдан Киевга “Темир гумбаз” етказиб беришни сўраган, бироқ Исроил буни рад этган.

Эслатиб ўтамиз, жорий йилнинг апрель ойида Украинага биринчи Patriot тизими Германия томонидан етказиб берилган эди.