“Сити” 1 киши кам бўлиб дербида ғалаба қозонди 

Кеча, 13 сентябрь куни “Манчестер Сити” Англия чемпионатининг тўртинчи турида сафарда “Манчестер Юнайтед”ни 1:0 ҳисобида мағлуб этди.

Учрашувдаги ягона голни Эрлинг Ҳоланд 60-дақиқада урди. “Манчестер Сити” 23-дақиқадан бошлаб бир киши кам бўлиб қолди. Ярим ҳимоячи Фил Фоден рақиб жамоа ярим ҳимоячиси Бруно Фернандешнинг қорнига тепгани учун спортга хос бўлмаган хатти-ҳаракатда айбланиб, майдондан четлатилди. Ўзбекистон миллий терма жамоаси аъзоси Абдуқодир Ҳусанов ўйинда захира ўриндиғида қолдирилди.

Ҳоланд бу голи билан Англия Премьер-лигасининг энг яхши тўпурарлари рўйхатида 4 та гол билан якка ўзи пешқадамга айланди. Норвегиялик ҳужумчи “Манчестер Юнайтед”га қарши ўйинлардаги 9-голини урди. У Манчестер дербисидаги голлар сони бўйича фақат Фрэнсис Ли ва Жо Хейс (10 тадан), Уэйн Руни (11 та)дан ортда қолмоқда.

Шунингдек, Ҳоланд Англия Премьер-лигасида 1992 йилдан буён икки жамоа ўртасидаги ўйинларда энг кўп гол урган футболчи ҳисобланади. У бу кўрсаткич бўйича Уэйн Руни ва аргентиналик Серхио Агуэрога (8 тадан) ортда қолдирди.

Маълумот учун, тўрт турдан сўнг 12 очко тўплаган ягона жамоалар “Манчестер Сити” ва “Арсенал” бўлиб турибди. “Манчестер Юнайтед” эса 4 очко билан 13-ўринда бормоқда. Эндиликда “қизил иблислар” жорий йилнинг 20 сентябрь куни сафарда “Фулхэм”га қарши ўйнайди. Шу куни “Манчестер Сити” ўз майдонида “Сандерленд”ни қабул қилади.