Сирдарёдаги боғчада амалиётчи 6 ёшли болага игна санчди

Сирдарё вилояти Сардоба туманидаги боғчада амалиётчи 6 ёшли боланинг танасига игна санчиб, таҳдид қилди. Бу ҳақда “Бу Кун” дастури хабар берди.

Билдирилишича, ҳолат жорий йилнинг 10 февраль куни Сирдарё вилояти Сардоба туманидаги болалар боғчасида содир бўлган. Касб-ҳунар мактабининг амалиётчи талабаси мазкур боғчага амалиёт ўташ учун борган бўлган. Мазкур талаба болаларга қараш вақтида 6 ёшли боланинг танасига игна санчган. Экспертиза хулосасига кўра, болага енгил тан жароҳати етказилган.

Боланинг онаси ўша куни фарзандининг ўртоқлари оналарига телефон қилиб, улардан ҳам игна ҳақида сўраган. Билдирилишича, фақат унинг ўғлига игна санчилган бўлган.

“Ўғлим ая, игна тиқди, деди. Биринчи ўртоқларимга тиқди, менга тиқмади, деди. Кейин ўртоқларининг оналарига телефон қилиб сўрадим, уларнинг фарзандларига игна санчилмаганини айтишди. Кейин ўғлимни видеога олиб, хўжайинимга жўнатдим. Ўғлим йиғлаб, қаерларига игна санчганини кўрсатиб берди”, дейди она.

Ҳолат юзасидан амалиётчи талаба қизга базавий ҳисоблаш миқдорининг бир баравари (375 000 сўм) миқдорида жарима жазоси тайинланган.

Эслатиб ўтамиз, 2024 йилнинг октябрь ойида Сирдарёда ўқитувчи 1-синф қизнинг қўлига игна санчгани айтилганди.  Ҳолат юзасидан Сирдарё тумани ИИБ ЖХХ ҲПБ томонидан терговга қадар текширув ҳаракатлари олиб борилган. Суриштирув давомида мутахассислар томонидан ушбу мактабнинг 1-“Е” синф ўқувчилари ҳамда уларнинг ота-оналари билан суҳбат ўтказганида суҳбатда иштирок этган 28 нафар ўқувчи ўқитувчиси томонидан ҳеч қанақа қўполлик қилмагани, қизни уришмагани, унга игна тиқмаганини билдирилган.