Си Цзиньпин Душанбега борди

Хитой Халқ Республикаси Раиси Си Цзиньпин расмий ташриф билан Тожикистонга келди. Бу ҳақда “Ховар” агентлиги хабар берди.

“Синьхуа” агентлиги хабарига кўра, уни аэропортда Тожикистон Президенти Имомали Раҳмон кутиб олди.

Тожикистон ТИВ Хитой раҳбарининг ташрифи 4 июлдан 6 июлгача давом этиши ҳақида хабар берган эди. Расмий ташриф доирасида Тожикистон Президенти Имомали Раҳмон билан тор ва кенг доираларда учрашув бўлиб ўтади, шунингдек, “давлатлараро, ҳукуматлараро ва идоралараро мустаҳкам ҳужжатлар тўплами” имзоланиши кутилмоқда.

Шунингдек, икки давлат раҳбарлари икки томонлама муносабатларни ривожлантириш, минтақавий ва халқаро кун тартибига доир қўшма баёнот қабул қилади.

Бундан ташқари, БМТ Бош котиби Антониу Гутерриш ҳам Тожикистонга борди. Душанбеда Бош котибнинг Тожикистон Президенти Имомали Раҳмон билан учрашуви режалаштирилган. Гутерришнинг ташрифи 5 июлга қадар давом этади.