Си Цзиньпин ҳам Москвадаги парадда қатнашади

Хитой Раиси Си Цзиньпин 2025 йил 9 май куни Москвада бўлиб ўтадиган СССРнинг фашистлар Германияси устидан қозонилган ғалабасининг 80 йиллигига бағишланган парадда иштирок этиш таклифини қабул қилди. Бу ҳақда Россиянинг Хитойдаги элчиси Игорь Моргулов хабар берди.

Элчининг сўзларига кўра, Си Цзиньпин Москвага келиш таклифини қабул қилган, шунингдек, Россия Президенти Владимир Путинни Япония устидан қозонилган ғалабанинг 80 йиллиги ва Иккинчи жаҳон уруши якунланганига бағишланган тантаналарда иштирок этиш учун Хитойга таклиф қилган.

Хитой томони ҳозирча Си Цзиньпиннинг Москвага ташрифи ҳақидаги маълумотга изоҳ бермаган. Россия Президенти матбуот котиби Дмитрий Песков 9 май куни бўлиб ўтадиган парадда кўплаб давлат раҳбарлари таклиф этилганини айтган. Жумладан, Москвага Словакия Бош вазири Роберт Фицо, Сербия Президенти Александр Вучич, Фаластин миллий маъмурияти Президенти Маҳмуд Аббос, Бразилия Президенти Луис Инасиу Лула да Силва келмоқчи.

Маълумот учун, Хитой Раиси Си Цзиньпин сўнгги бор Москвага 2023 йил март ойида келган. Ўшанда у Россия Президенти Владимир Путин билан музокаралар ўтказган. Путин 2024 йилги парадга Марказий Осиё давлатлари раҳбарларини таклиф қилганди.

Эслатиб ўтамиз, 9 май куни Москвада парадда Шимолий Корея ҳарбий хизматчилари ҳам иштирок этиши хабар қилинганди.

north_east

Москвада 9 май кунига бағишланган ҳарбий парад бошланди (видео)