Москвада 9 май кунига бағишланган ҳарбий парад бошланди (видео)

Москвадаги Қизил майдонда Ғалаба кунига бағишланган ҳарбий парад бошланди. Парадни Россия телеканаллари эфирга узатмоқда.

Россия Мудофаа вазирлиги маълумотларига кўра, парадда тўққиз мингдан ортиқ киши ва 70 та техника иштирок этмоқда. Пиёда устун таркибига қўшинларнинг турлари ва бўлинмалари бўйича полклар, батальонлар ва Суворов, Нахимов, кадет ва мусиқа мактаблари экипажлари, Ёшлар армияси аъзолари, аскарлар ва казаклар, шунингдек, бирлашган ҳарбий оркестр киради.

Москвада 9 май шарафига парад қор ёғаётган пайтга тўғри келган. Синоптиклар шамол тезлиги секундига 15-18 метргача етишини тахмин қиляпти. Шу билан бирга, парад Россия авиация гуруҳларининг парвози билан якунланиши кутилмоқда.

Москвадаги парадда Қозоғистон, Қирғизистон, Ўзбекистон, Тожикистон, Туркманистон, Лаос, Гвинея-Бисау ва Куба президентлари иштирок этмоқда. Бундан ташқари, Александр Лукашенко ити билан парадга келди.

9 май шарафига ҳарбий парадлар ҳарбий округлар, флот ва қўшма қуролли қўшинлар штаб-квартиралари жойлашган 25 та шаҳарда ўтказилади. Ғалаба байрамини нишонлаш учун жами 150 мингга яқин киши ҳамда икки ярим мингга яқин турдаги қурол-яроғ ва ҳарбий техника жалб этилган.

Маълумот учун, 9 май шарафига Москвадаги ҳарбий парад Украинада Россия томонидан бошланган кенг кўламли уруш пайтида бўлиб ўтяпти.