СИ хавфи сабаб Британияда ёшлар ҳунар ўрганишни танлаяпти

Сунъий интеллектнинг тез суръатларда ривожланиши Буюк Британияда меҳнат бозорини тубдан ўзгартирди. Шу ўзгаришлар фонида кўплаб ёшлар офис ишларидан воз кечиб, сантехниклик, дурадгорлик, пайвандчилик, электрмонтажчи каби қўл меҳнати талаб қиладиган ҳунармандчилик касбларини танламоқда. Chartered Institute of Personnel and Development бу борадаги тадқиқотини эълон қилди.  

Институт тадқиқотларига кўра, ҳар 6 иш берувчидан бири келаси 12 ойда СИ туфайли ходимлар сонини қисқартиришни режалаштирган. Бу вазият, айниқса, 18-35 ёш орасидаги ёшларда хавотирни кучайтирмоқда. Натижада улар сунъий интеллект ўрнини боса олмайдиган, амалий кўникмалар талаб этадиган ва доимий эҳтиёж юқори бўлган касбларни афзал кўра бошлаган.

Буюк Британия бўйлаб техник коллежларда қурилиш, муҳандислик ва сервис йўналишларига қизиқиш йил сайин ортиб бормоқда. Баъзи ўқув юртларида сантехника ва электрчилик курсларига талаб шу қадар кўпайганки, гуруҳлар тез тўлиб, ҳатто навбат юзага келган.

Мутахассислар бунга икки асосий сабабни кўрсатади:  

Биринчиси – СИ хавфи. Офис ишларининг автоматлаштирилиши ёшларни келажак касбини стратегик танлашга ундади.

Иккинчиси сабаб эса университет шартномаларининг қимматлиги. Кўплаб ёшлар минглаб фунт қарз олиш ўрнига, тез ўзлаштириладиган ва яхши даромад берадиган амалий касбларни маъқул кўряпти. 

Коллеж талабалари ҳам касб танловини айнан шу омиллар билан изоҳлайди. Уларнинг фикрича, офисдаги кўплаб вазифаларни алгоритмлар бажариши мумкин, аммо инсон қўли ва тажрибасига таянадиган ҳунармандчилик касбларининг ўрнини сунъий интеллект тўлиқ боса олмайди. 

Эслатиб ўтамиз, аввалроқ СИ вазир сабаб Албания парламентида жанжал чиққани ҳақида хабар берилганди. , Албания парламенти ҳукумат дастурини тақдим этиш ва янги Вазирлар Маҳкамасига ишонч овози бериш учун йиғилиш ўтказган, Пиксел ва кодлардан тузилган, сунъий интеллект орқали ишлайдиган виртуал вазир “Диелла”нинг нутқи мухолифат депутатларининг салбий муносабатини келтириб чиқарган, улар столларни уриб, Бош вазирга шишадан ишланган конституцияни улоқтиришган.