Швейцарияда дунёдаги энг баланд 3D минора қуриляпти (фоторепортаж)

Швейцариянинг тоғли Мюленс қишлоғида 3D технологияси асосида дунёдаги энг баланд минора қурилмоқда. Бу ҳақда "Euronews" нашри хабар берди.

Билдирилишича, баландлиги 30 метр бўлган бино “Tor Alva” деб аталади ва у битказилганидан сўнг, дунёдаги энг баланд 3D принтерда чоп этилган иншоотга айланади.

Мюленснинг футуристик оқ минораси ташқи кўриниши жиҳатидан илмий-фантастик фильмларни эслатади. Бундай дизайн Швейцариянинг иқлимидан келиб чиқиб, ишланган.

Мамлакат Алп тоғларининг қорли чўққилари билан ўралган. Шу боис бу иншоот совуқ қиш ва кучли шамолларга бардош бера олувчи фил суягидан ясалган дарахтни эслатади.

Бино маданий маскан сифатида жорий, 2024 йилнинг июнь ойидан ўз фаолиятини бошлайди. Унда концерт зали, бадиий монумент ва ёдгорликлар бўлиши режалаштирилган. 

Ушбу ажойиб бино лойиҳаси уч йил аввал Шимолий ва Жанубий Европа ўртасидаги муҳим транзит нуқтада жойлашган қишлоқларни жонлантириш ташаббуси сифатида бошланган. Гап шундаки, минора ўрнатилаётган Мюленс қишлоғи аҳолиси 19 асрдан бери кескин камайди. Бугунги кунда у ерда атиги 16 киши яшайди ва кўплаб бинолар ташландиқ ва бўм-бўш ҳолда қолмоқда. Nova Fundaziun Origen жамғармаси “Tor Alva” каби меъморий мўъжиза ҳудуднинг тикланиши, одамларнининг бу ерга ташриф буюриши, спектакль томоша қилиши ва ҳатто бир неча кечани қишлоқда ўтказишига  умид қилмоқда.

Лойиҳа устида ўнлаб муҳандислар ва тадқиқотчилар бир неча йил ишлади. Қурувчилардан бирининг сўзларига кўра, бинода 32 та префабрик устунлар бўлади. Уларни осонгина 3D принтерда чоп этиш ва жойида йиғиш мумкин. Қизиғи шундаки, бу устунлар арматурадан ясалади. Билдирилишича, шу вақтга қадар бундай принтердан фақатгина бетон қуйиш учун фойдаланиларди. Энди эса бетонга арматура қўшиш амалиёти ҳам йўлга қўйилди. Бу эса иншоотни жуда баланд бўлиши имконини беради.

Миноранинг юқори қаватидаги театр майдони 45 кишини ўз бағрига сиғдира олади. Бу ерда юқоридан атрофдаги тоғларни кузатиш мумкин. Минора устунлари эса ташриф буюрувчиларни қишнинг совуқ ҳавосидан ҳимоя қилиш учун мембрана билан ўралади.

Февраль ойидаёқ бинонинг пастки қаватини ташкил этувчи дастлабки саккизта устунни босиб чиқаришга старт берилган. Барча элементларни 3D принтерда чоп этиш учун 900 соат вақт кетиши айтилмоқда.