Шоҳжаҳон Эргашевнинг навбатдаги жанги санаси маълум бўлди

Профессионал бокснинг супер енгил (-63,5 кг) вазн тоифасида рингга чиқаётган ўзбекистонлик Шоҳжаҳон Эргашев (17-0, 15 КО) 2020 йилнинг бошида ўзининг навбатдаги жангини ўтказади. “BoxRec” маълумотлари шундан дарак беряпти.

Эргашев келаси йилнинг 10 январь куни америкалик Кит Хантерга (11-0, 7 КО) қарши рингга чиқади. Жанг Нью-Жерси штати маркази Атлантик Сити шаҳрида бўлиб ўтади. 12 раунддан иборат жанг ғолиби айни вақтда Марио Барриос (25-0, 16 КО) эгалик қилаётган WBA нинг “оддий” камари WBA Regular чемпионлик камари учун расмий даъвогарга айланади.

Маълумот учун, Кит Хантер фаолияти давомида 11 та жанг ўтказган бўлиб, 10-жангида у ўзбекистонлик бошқа бир боксчи Санжарбек Раҳмоновга (12-2-1,6 КО) қарши рингга чиқиб, ғолиб бўлганди. Ўшанда 2-раундда Санжар Раҳмонов нокдаун ҳолатига тушгани учун ҳисоб очилган, бироқ кўпчиликнинг фикрига кўра, ҳакамларнинг якуний қарори баҳсли бўлган.

Шоҳжаҳон Эргашев бугунгача 17 жанг ўтказиб, барчасида ғалаба қозонган.