Шарманда бўлаётган ўзбек MMA’си

Бугунги кунга келиб, ўзбекистонлик 3 нафар жангчи Аралаш яккакурашлар, яъни MMA оламидаги энг нуфузли лига ҳисобланмиш UFC’да жанглар ўтказиб келмоқда. Ҳозирда уларнинг натижалари жуда оламшумул бўлмаса ҳам, лекин қайд этаётган натижалари ёмон эмас ва йилдан йилга мазкур лигада жанг қилаётган ўзбекистонлик спортчилар сони кўпаймоқда.

Шунингдек, яна кўплаб ўзбекистонлик MMA усталари турли лигаларда жанглар ўтказиб келмоқда. Бугунги кунда “Octagon”, “Oktagon”, “Naiza”, GFL ва бошқа кўплаб промоушенларда Ўзбекистон вакиллари фаолият юритмоқда.

Қисқа вақт ичида ўзбек MMA’сидаги прогрессни қайд этиш жоиз, бироқ охирги пайтларда ижтимоий тармоқлар орқали ўзини “намойиш этиб”, ҳали яхши тажрибага эга бўлмасдан пиар ва ҳайпга “ўтириб олиб”, таниқли лигалардан жанг сўраётган ва октагонга кўтарилаётган “спортчилар” ҳам йўқ эмас ва улар сони борган сари кўпайиб бормоқда.

QALAMPIR.UZ бу галги интервьюсида таниқли жангчи, ўзбек муайтайининг ёрқин вакили Мавлуд Тифиевга микрофон тутиб, охирги пайтларда турли лигалардан жанг сўраб, ижтимоий тармоқларда чиқиш қилаётган ва бунинг ортидан ўзбек MMA’сини шарманда қилаётган шахслар бўйича муносабат олди.

“Булар ҳали спорт нима эканлигини тушуниб етмаяпти. Бунақалар спортнинг ичига озроқ кирса, нимага қўл уриб қўйганини англаб етади. Тармоқларда чиқиш қилаётган ва лигалардан жанг сўраётган одамларнинг асосий мақсади тезроқ машҳур бўлишдан бошқа ҳеч нарса эмас”, дейди Тифиев.

Суҳбат давомида Мавлуд Тифиев ўз фаолияти билан боғлиқ бир қатор саволларга, жумладан спортдан олган энг катта гонорари, келгуси жанги ва тез орада UFC’га қўшилиши мумкин бўлган жангчилар ҳақида айтиб ўтди.