Сербия Президенти истеъфога чиқиши мумкин

Сербия Президенти Александр Вучич ўзининг сиёсий фаолияти якунланишига яқинлашаётганини айтиб, яқин орада истеъфога чиқиши мумкинлигини билдирди. Бу ҳақда N1 телеканали хабар берди.

“Балким мен тез орада истеъфога чиқарман”, деди Вучич.

Шу билан бирга, у аввалги президент Борис Тадич каби президентлик муддатини қисқартириш ниятида эмаслигини таъкидлади. Унинг айтишича, президент ёки муддат охиригача лавозимда қолади, ёки истеъфога чиқади.

Вучич 2017 йил 31 майдан бери Сербия Президенти сифатида фаолият юритиб келмоқда. У 2022 йил апрелида қайта сайланган бўлиб, иккинчи муддат 2022 йил майида бошланган. Амалдаги президентлик муддати 2027 йил 31 майда якунланади. Сербия Конституциясига кўра, бир шахс икки мартадан ортиқ президент этиб сайланиши мумкин эмас ва ҳар бир муддат 5 йил давом этади.

Вучич аввалроқ ҳокимиятда қолиш учун Конституцияни ўзгартирмаслигини ҳам бир неча бор таъкидлаган. У ўзини “сиёсий ветеран” деб атаб, президентлик фаолиятини яқин йилларда якунлашини айтган эди.

Эслатиб ўтамиз, аввалроқ АҚШ Миллий разведкаси директори Тулси Габбард АҚШ Президенти Дональд Трамп номига истеъфо аризасини ёзгани тўғрисида хабар берилган эди.