Сербия фуқароларини Эрондан тезроқ чиқиб кетишга чақирди

Бугун, 21 февраль куни Сербия ҳукумати Эрондаги вазият ёмонлашгани сабабли ўз фуқароларини мамлакатни имкон қадар тезроқ тарк этишга чақирди. Бу ҳақда Сербия Ташқи ишлар вазирлиги расмий баёнот берди.

Вазирликка кўра, яқин кунларда Сербия фуқароларига Эронга сафар қилмаслик тавсия этилган. Ҳозирда ушбу мамлакатда бўлиб турганлардан эса имкон қадар тезроқ мамлакатни тарк этиш сўралган.

Сербия жорий йилнинг январь ойининг ўрталарида ҳам фуқароларини Эронни тарк этишга ва бу давлатга бормасликка чақирган. Ўшанда Эрон ҳукумати оммавий норозилик намойишларини куч билан бостиргани айтилганди.

Сўнгги баёнот АҚШ Президенти Дональд Трампнинг Эрон ядровий дастури бўйича баёнотлари ортидан янгради. Трамп музокаралар натижа бермаса, Эронга нисбатан чекланган ҳарбий зарба бериш масаласи кўриб чиқилаётганини билдирган. Шунингдек, у Яқин Шарқда АҚШ ҳарбий-денгиз кучларини кучайтириш бўйича топшириқ берган.

Эрон эса АҚШ билан ядровий дастур бўйича тезкор келишувга эришишга умид қилаётганини маълум қилган. 

Эслатиб ўтамиз, аввалроқ Польша Бош вазири Дональд Туск Эронда бўлиб турган фуқароларини минтақадаги вазиятнинг эҳтимолий кескинлашуви фонида зудлик билан мамлакат ҳудудини тарк этишга чақирганди.