Сенегалнинг ЖЧдаги шифокори гинеколог бўлиб чиқди

Сенегал миллий терма жамоаси шифокори спортчилар билан ишлаш учун зарур малакага эга мутахассис эмас, гинеколог экани маълум бўлди. Бу ҳақда кеча, 13 июль куни журналистлар билан бўлиб ўтган матбуот анжуманида мамлакат футбол федерацияси президенти Абдулай Фалл маълум қилди.

“Бизнинг доимий шифокоримиз футболчиларимизга ғамхўрлик қилиш учун зарур ихтисосликка эга эмас. Доктор Федиор гинеколог ва мен бу ҳақда жуда кеч билдим”, дейди Фалл.

Унинг сўзларига кўра, Сенегал терма жамоаси футболчилари ҳам шифокорнинг иш услубига шубҳа билан қараган ва кўрсатилаётган тиббий ёрдам сифатига тўлиқ ишонмаган.

Нашрнинг ёзишича, федерация 2026 йилги Жаҳон чемпионати давомида тиббий штабни кучайтириш мақсадида қўшимча равишда спорт тиббиёти бўйича мутахассисни ишга жалб қилган.

Шу билан бирга, Сенегал спорт тиббиёти ассоциацияси мазкур айбловларни рад этиб, уларни “асоссиз ва туҳмат” деб атаган. Ассоциация баёнотида қайд этилишича, доктор Федиор гинекология бўйича дипломдан ташқари, Шейх Анта Диоп университетида спорт тиббиёти бўйича ҳам махсус диплом олган.

Эслатиб ўтамиз, Сенегал терма жамоаси 2026 йилги Жаҳон чемпионатида 1/16 финалда Бельгияга қўшимча бўлимларда 3:2 ҳисобида мағлуб бўлиб, мусобақани тарк этган эди. Сенегалликлар учрашувнинг 86-дақиқасига қадар 2:0 ҳисобида олдинда бораётган бўлса-да, асосий вақтда икки, қўшимча бўлимларда эса яна бир гол ўтказиб юборди.

Жамоа мундиални тарк этганидан сўнг федерация бош мураббий Пап Тиавни ўз лавозимидан озод қилди.