Савдо уруши: Европа ҳам АҚШга нисбатан жавоб чораларини кечиктирди

Европа Иттифоқи ҳам АҚШга нисбатан киритилган қарши чораларни 90 кунга кечиктиради. Бу ҳақда Еврокомиссия раҳбари Урсула фон дер Ляйен Х ижтимоий тармоғида ёзиб қолдирди.

Еврокомиссия раҳбарига кўра, АҚШ билан ўтказиладиган музокаралар муваффақиятсизликка учраган тақдирда, қарши чоралар қайтарилади.

“Биз музокараларга имконият бермоқчимиз” дея ёзган фон дер Ляйен.

Шу билан бирга, у кейинги қарши чоралар устида иш давом этаётгани, Европа Иттифоқи барча вариантларни кўриб чиқаётганини ҳам қўшимча қилган.

Еврокомиссия баёнотига кўра, АҚШ Президенти Дональд Трампнинг божлар жорий этилишини 90 кунга тўхтатиб туриш тўғрисидаги қарори жаҳон иқтисодиётини барқарорлаштириш йўлидаги муҳим қадамдир.

Эслатиб ўтамиз, аввалроқ Трамп маъмурияти билан савдо можароси чоғида Европа Иттифоқи давлатлари Америка импортига биринчи жавоб божлари тўғрисида келишиб олганди ва биринчи жавоб божлари 15 апрелдан кучга кириши кутилаётгани хабар қилинганди. Кейинроқ АҚШ Президенти Дональд Трамп 90 кун давомида савдо бўйича ҳамкорларга нисбатан кенг кўламли божларни жорий этишни тўхтатиб туришини маълум қилди.