Саратонга чалинган қизалоқ Президент ва онасининг расмини чизиб, Эрдўғанга совға қилди (видео)

Туркиянинг Анқара шаҳрида лейкемия касаллигига чалинганидан сўнг расм чизишни бошлаган ва касалликни енгган 12 ёшли Буғлем Йилмаз жорий йилнинг 23 апрель куни Миллий суверенитет ва болалар байрами муносабати билан Президент Ражаб Тойиб Эрдўғанга онаси Танзила Эрдўған билан тушган суратни совға қилди. Бу ҳақда TRT Haber хабар берди.

Қайд этилишича, Буғлем Йилмазга 2,5 ёшида лейкемия (қон саратони) ташхиси қўйилган. Буғлем 2 йиллик кимёвий терапия билан касалликни енгган. Аммо 2018 йилда, у 6 ёшга тўлганда, касаллик қайталанган ва у яна шифохонага ётқизилган.

Бу даврда Йилмаз шифохонада расм чизишни бошлаган ва расм чизиш машғулоти ўзи учун яхши иш эканини тушунган. Даволаниш жараёнидан кейин ҳам расм чизишни давом эттирган Буғлем шифохонадан чиққанидан кейин турли рассомлардан таълим олган. Шифохонада бошланган расм чизиш иштиёқи билан яна ҳаётга қайтган Буғлем 50 га яқин расм чизган. Кўплаб гуруҳ кўргазмаларида қатнашган қизча ўтган йилнинг 27 май куни мамлакатнинг Эрзурум вилоятидаги Караязи туманига қарашли Улужанлар қамоқхонасининг музейида биринчи шахсий кўргазмасини очган.

Телефонининг экранида онасининг сурати ҳам борлигини айтган Эрдўған қизчага қараб, “Буни унутиш мумкинми? Она унутилмас! Ўлса ҳам унутилмайди!” деган.

Биринчи шахсий кўргазмасини 45 та асар билан очганини айтган Йилмаз 2026 йилда яна бир кўргазмаси бўлишини маълум қилган.

“Келаси йил яна бир кўргазмам бўлади. Сизни таклиф қиламан, унутманг!” деган қизча.

Давлат раҳбари эса унинг таклифини унутмаслигини айтиб, қизчанинг айни пайтда ҳам давом этаётган даволаниш муолажалари бўйича масъулларга кўрсатма берган.